Almatydaǵy qarý-jaraq dúkeninen urlanǵan qarý Tarazdan tabyldy
Jambyl oblysynda urlanǵan qarýdy ǵana emes, jalpy zańsyz aınalymdaǵy qarýdy tabý jáne tárkileý boıynsha jumystar júrgizilip jatyr.
Qarý jasyrylǵan taǵy bir oryndy 2023 jylǵy 12 aqpanda Jambyl oblysy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri tapty.
Taraz qalasynda 2022 jylǵy qańtarda Almaty qalasyndaǵy qarý-jaraq dúkeninen urlanǵan 308 Win kalıbrli Benelli Argo-E karabın myltyǵy jáne patronymen birge 9 mm kalıbrli SM Action gaz tapanshasy tabylyp, tárkilendi.
– Atalǵan derekke qatysty sot-ballıstıkalyq saraptamasy taǵaıyndaldy. QR QK-niń 287-babynyń 3-bóligi (Qarýdy, oq-dárilerdi jarylǵysh zattar men qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý) boıynsha sotqa deıingi tergeý amaldary júrgizilip jatyr. Jedel-izdestirý is-sharalary barysynda bizdiń qyzmetkerler qarý-jaraqtardy anyqtaýdy jáne olardy zalalsyzdandyrýdy jalǵastyryp jatyr, – dedi Polıtsııa departamenti esirtki qylmysyna qarsy is-qımyl basqarmasynyń bastyǵy Álim Bajyqbaev.
Foto: polisia.kz