Almatydaǵy qańǵybas ıtterdi aýlaýǵa 100 mln. teńge qarastyrylǵan
ALMATY. 30 shilde. QazAqparat - Qańǵybas ıtter pen mysyqtardy aýlap, óltirý arqyly olardyń sanyn azaıtý múmkin emes.
Janýarlardy qorǵaýmen aınalysatyn qoǵamdyq uıymdardyń ókilderi búgin Almatyda ótkizgen baspasóz máslıhatynda osylaı málimdedi.
«Almaty qalasyndaǵy qańǵybas ıt pen mysyqtardy aýlaýǵa 2008 jyly 78 mln teńge bólingen eken. Bıyl onyń kólemi 100 mln. teńgege deıin jetip otyr. Alaıda olardyń sany buryn qandaı bolsa, áli sol qalpynda. Sondyqtan baspanasyz janýarlardy aýlap, joıý bul máseleni tolyq sheshe almaýda», - deıdi «Úmit araly» janýarlarǵa kómek kórsetý qorynyń dırektory Natalıa Petkevıch. Al ıt pen mysyqqa arnalǵan «Jańa úmit» panajaıynyń uıymdastyrýshysy jáne qoǵamdyq qor prezıdenti Dılıara Súleımenovanyń aıtýynsha, quzyrly organdarǵa árbir qańǵybas ıtti aýlap, ony ıesi tabylǵansha 3 kún boıy kútip-ustaýǵa memleket 3800 teńge jumsaıdy. Alaıda olardyń tabıǵı ósimin baqylaı almaı otyr. Álemniń ózge elderi qańǵybas ıt pen mysyqtarǵa ota jasaý arqyly urpaq taratý múmkindigin shekteıdi. Qazaqstan da osy jolmen júrse, janýarlardy qatigezdikpen qyryp-joıýǵa tosqaýyl qoıylmaq.
