Almatydaǵy iri saýda úıine tórtinshi ret bomba qoıyldy
ALMATY. QazAqparat- Almatydaǵy MOSKVA Metropolitan oıyn-saýyq ortalyǵynyń qyzmetkerleri men kelýshileri taǵy da evakýatsııalandy, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, saýda úıleriniń birinde bomba qoıyldy degen habar polıtsııaǵa 7 shilde kúni saǵat 12:12-de túsken.
«Mundaı habarlamalarǵa alǵashqy jaýap berý algorıtmi aıasynda birinshi kezekte kelýshiler men ortalyq qyzmetkerleri evakýatsııalandy. Mamandar júrgizgen tekserýden keıin habarlamanyń jalǵan ekeni, jarylǵysh zat tabylmaǵany belgili boldy»,- dep habarlady vedomstvadan.
Aıta keteıik, ortalyqta bomba qoıyldy degen shaqyrý polıtsııaǵa shildeniń 4-i kúni de túsken bolatyn. Osyǵan uqsas sıpattaǵy aldyńǵy habarlamalar 21 jáne 12 maýsymda bolǵan.
Barlyq jaǵdaıda aqparat jalǵan bolyp shyqty .
