Almatydaǵy HQO-da kelinshek bosanyp qala jazdady
ALMATY. QazAqparat - Almatylyq kelinshek Halyqqa qyzmet kórsetý ortalyǵynda bosanyp qala jazdady, dep habarlaıdy QazAqparat tilshisi.
Bul jaǵdaı Almatydaǵy HQO birinde jaqynda bolǵan. Ol týraly «Azamattarǵa arnalǵan úkimet» memelkettik korporatsııasynyń resmı ókili Murat Jumanbaı áleýmettik jelidegi paraqshasynda habarlady.
«7 qarasha kúni Alııa Altýnıaı Medeý aýdandyq HQO-ǵa bala týǵanǵa deıingi qujattaryn retteýge barǵan. Kezekke turý talonyn alyp úlgermesten Álııanyń tolǵaǵy bastalyp ketken. Jedel járdem kelgenge deıin Álııa ortalyq dırektorynyń kabınetinde qyzmetkerlerdiń baqylaýynda bolǵan. Jedel járdem kelgende onyń tolǵaǵy kúsheıip, perzenthanaǵa jete salysymen eki qyzdy dúnıege ákeldi», - deıdi Murat Jumanbaı.
Medeý aýdandyq HQO qyzmetkerleri onyń bosanyp, aýrýhanadan shyǵýyn asyǵa kútkenin aıtady. Perzenthanadan shyǵatyn kúni ortalyq qyzmetkerleri ony quttyqtaýǵa barǵan.
Álııanyń aıtýynsha, egizder otbasynyń tuńǵyshy emes, qyzdardyń Álı esimdi aǵalary bar. Otbasy egizderge Eda, Elıf dep at qoıǵan. Otaǵasynyń ulty túrik bolýyna baılanysty osyndaı erekshe esim berilgen. Anasynyń aıtýynsha, Eda, Elıftiń maǵynasy «jomart», «sabyrly» degendi bildiredi. Egizderdiń de, olardyń anasynyń da jaǵdaıy jaqsy. Búgin Álııa bala týýyna jáne kútimine baılanysty beriletin járdemaqyny alýǵa keldi», - deıdi Murat Jumanbaı.
