Almatydaǵy Halyqaralyq shańǵymen tuǵyrdan sekirý kesheni rekordtar ordasyna aınalýy múmkin -QR Ulttyq olımpıada komıtetiniń vıtse-prezıdenti
ALMATY. Qyrkúıektiń 22-si. QazAqparat /Erlik Erjanuly/ - Almatyda bıyl alǵashqy kezeńi iske qosylǵaly otyrǵan Halyqaralyq shańǵymen tuǵyrdan sekirý kesheni rekordtar ordasyna aınalýy múmkin.
Bul jaıly qyrkúıektiń 25-26-sy kúnderi shańǵymen tuǵyrdan sekirýden Qurlyqaralyq kýbok jarysyn uıymdastyrýshylar búgin Almatyda ótkizgen baspasóz máslıhatynda málim etti.
"Álemde K95 jáne K125 sııaqty 500 shańǵymen tuǵyrdan sekirý nysany bar. Al Almatyda bıyl alǵashqy kezeńi iske qosylǵaly otyrǵan keshenniń ázirge álemde esh teńdesi joq. Onda barlyq qosalqy ǵımarattar men jarys kórermenderine yńǵaıly jaǵdaı qarastyrylǵan. 2011 jylǵy Qysqy Azııa oıyndarynan keıin júzege asyrylatyn keshen qurylysynyń 2-shi kezeńinde sport zaly, júzý basseıni, oqý ortalyǵy salynǵaly otyr", deıdi QR Ulttyq olımpıada komıtetiniń vıtse-prezıdenti, "VII Qysqy Azııa oıyndary" boıynsha Almaty qalasy ákiminiń keńesshisi Pavel Novıkov. Onyń aıtýynsha, álemdegi ózge shańǵymen tuǵyrdan sekirý nysandarynda turaqty kórermenderge arnalǵan trıbýna men basqa da qyzmetterdiń qosalqy nysandary joq. Olar jarystar bolatyn kezde ǵana qurastyrylyp, odan keıin basqa jerge aýystyrylyp otyrady. Halyqaralyq shańǵy federatsııasynyń talaptaryna tolyqtaı saı keletin jańa keshende sportshylarǵa da, kórermenderge de barlyq jaǵdaı jasalǵan.
"2011 jylǵy qysqy Azııa oıyndary dırektsııasynyń" Almaty qalasyndaǵy dırektory Sultanmahmut Shoqpytovtyń sózinen qaraǵanda, shańǵymen tuǵyrdan sekirý kesheni qurylysynyń alǵashqy kezeńin júzege asyrýǵa 14 mıllıard teńge jumsalmaq. Al ekinshi kezeńniń qaı ýaqytta aıaqtalatyny ázirge belgisiz.
"Mundaı iri sport keshenderin birden iske qosý múmkin emes. Olar barlyq elde de kezeń-kezeńimen birtindep paıdalanýǵa beriledi. Bul qalypty jaǵdaı", deıdi Pavel Novıkov.
