Almatydaǵy halyqaralyq konferentsııada kómeıdiń qabyný aýrýlaryn emdeý joldary talqylandy
ALMATY. QazAqparat - Búgin Almatyda №5-shi qalalyq klınıkalyq aýrýhananyń konferents zalynda S.Asfendııarov atyndaǵy Qazaq Ulttyq Medıtsına Ýnıversıteti otorınolarıngologııa kafedrasynyń 80-jyldyq mereıtoıyna oraı, halyqaralyq ǵylymı-tájirıbelik konferentsııa bolyp ótti.
Onyń jumysyna otorınolarıngologııa, ıaǵnı qulaq, muryn jáne tamaq aýrýlaryn emdeý salasynda eńbek etip kele jatqan otandyq bilikti mamandar, sondaı-aq, TMD elderinen kelgen belgili ǵalymdar qatysty. Olardyń ishinde Máskeýdegi L.Sverjevskıı atyndaǵy ǵylymı-zertteý klınıkalyq ınstıtýty qýystyq aǵzalar jáne moıynnyń rekonstrýktıvti hırýrgııasy bóliminiń meńgerýshisi, medıtsına ǵylymdarynyń doktory, professor Elena Kırasırova jáne QR UǴA akademıgi, Qazaqstannyń otorınolarıngologtar qaýymdastyǵynyń prezıdenti, medıtsına ǵylymdarynyń doktory Raıs Tólebaev boldy.
«Biz byltyr ǵana S. Asfendııarov atyndaǵy QazUMÝ-dyń 85 jyldyǵyn atap ótken edik. Endi mine, eń alǵashqy kafedralardyń biri - 1936 jyly qurylǵan Qulaq, muryn jáne tamaq aýrýlary kafedrasynyń 80 jyldyǵyn atap ótip jatyrmyz. Búgingi konferentsııanyń basty maqsaty - 80 jyl ishinde atqarylǵan jumystar jaıynda esep berý, shet eldik áriptestermen ózara tájirıbe almasý jáne osy saladaǵy ózekti máselelerdi talqylap, olardy sheshýdiń joldaryn izdestirý. Óıtkeni, Qazaqstanda mundaı aýrýlarmen aýyratyn naýqastar jeterlik. Ásirese, óte kúrdeli bolyp keletin kómeıdiń ár túrli qabyný aýralaryn emdeýde sheshimin tappaı jatqan máseleler jeterlik. Mysaly, osy naýqastardy ortalyqtandyrylǵan dárejede emdeý úshin zamanaýı arnaıy ortalyq ashý máselesi de qaralady», - dedi «QazAqparat» tilshisine bergen jaýabynda S. Asfendııarov atyndaǵy QazUMÝ otorınolarıngologııa kafedrasynyń professory, medıtsına ǵylymdarynyń doktory Amangeldi Kúlimbetov.
Konferentsııa barysynda otorınolarıngologııa kafedrasyn 2002-2014 jyldar arasynda basqarǵan medıtsına ǵylymdarynyń doktory, professor Damılá Jaısaqova jáne osy kafedranyń professory, medıtsına ǵylymdarynyń doktory Amangeldi Kúlimbetov Qazaqstannyń ulttyq medıtsına qaýymdastyǵynyń «Altyn dáriger» tósbelgilerimen marapattaldy.
Sonymen qatar, konferentsııa aıasynda № 5 qalalyq klınıkalyq aýrýhanasynyń bazasynda «Kómeıdiń qabyný aýrýlary» taqyrybynda sheteldik jetekshi ǵalymdardyń qatysýymen sheberlik synyptary júrgizildi.
Aıta ketelik, S.J.Asfendııarov atyndaǵy Qazaq Ulttyq Medıtsına Ýnıversıteti alys jáne jaqyn shetel memleketterimen tyǵyz qatynastaǵy medıtsınalyq jáne ǵylymı kadrlardyń oshaǵy bolyp tabylady.
