Almatydaǵy halyqaralyq konferentsııada azamattyq qorǵanys máseleleri talqylandy (FOTO)
ALMATY. QazAqparat - Almatyda qalalyq Tótenshe jaǵdaılar departamentinde «QR Azamattyq qorǵanysy: ahýaly, máseleleri, keleshegi» atty taqyrypta Halyqaralyq ǵylymı-tájirıbelik konferentsııa bolyp ótti.
Ol Qutqarýshy kúniniń 20 jyldyǵyna oraılastyryldy.
Óziniń alǵy sózinde Almaty q. TJD basshysynyń orynbasary, polkovnık Erlan Nurpeıisov QR Іshki ister mınıstriniń orynbasary V. Bojkonyń quttyqtaý hatyn oqydy. Sondaı-aq ol Qazaqstannyń azamattyq qorǵanys salasyn ǵylymı-tehnıkalyq, uıymdyq-quqyqtyq jáne ádistemelik bazasyn jetildirmeı, ony zaman talabyna saı damytý múmkin emestigin atap ótti.
«Qazaqstanda ındýstrııalyq-ınnovatsııalyq damý baǵdarlamasy ekonomıkanyń, áleýmettik qamsyzdandyrý júıesiniń damýyna zor serpin berýde. Búgingi jıyndy ótkizýdegi basty maqsat - tótenshe jaǵdaılardyń aldyn alý jáne ony joıý salasynda ǵylymı jáne zertteý qyzmetin damtý, ózara tájirıbe almasý, órt qaýipsizdigi jáne azamattyq qorǵanys máselelerin sheshýde ortaq tásildeme ázirleý. Al bul, órt sóndirýdiń jańa zamanaýı ádisterin der kezinde meńgerip, paıdalanýǵa múmkindik beredi», - dedi Erlan Nurpeıisov.
Al QR ІІM Tótenshe jaǵdaılar jónindegi komıtetiniń Órt qaýipsizdigi jáne azamattyq qorǵanys ǵylymı-zertteý ınstıtýtynyń dırektory, tehnıka ǵylymdarynyń doktory, professor Rýslan Jumaǵalıev óz baıandamasynda elimizde órt qaýipsizdigi jáne azamattyq qorǵanys salasynda zamanaýı zertteý bazasyn qurý kerektigin usyndy.
Búgingi sharaǵa elimizdiń ár óńirinen azamattyq qorǵanys jáne órt qaýipsizdigi salasynyń mamandary jáne birqatar elderden ókilder qatysty.
