Almatydaǵy ǵylymı-tájirıbelik konferentsııada «Ádilet» tarıhı-aǵartý qoǵamynyń 25 jyldyq jumysy qorytyndylanýda
ALMATY. QazAqparat - Búgin Almatyda «Ǵylym ordasy» RMK kesheninde «Ádilet» tarıhı-aǵartý qoǵamynyń qurylǵanyna 25 jyl tolýyna oraı «Ádilet» qoǵamyna 25 jyl» atty Respýblıkalyq ǵylymı-tájirıbelik konferentsııa ótýde.
Oǵan ǵalymdar, zertteýshiler, saıası qýǵyn-súrgin qurbandarynyń urpaqtary qatysýda.
«Ádilet» tarıhı-aǵartý qoǵamy Sanjar Orazuly Jandosovtyń uıymdastyrýymen budan 25 jyl buryn, 1989 jyly sáýir aıynda qurylǵan bolatyn. Odan bertin kele bul qoǵamdy Manash Qozybaev, Murat Baımaqanov, Keńes Nurpeıisov syndy kórnekti ǵalymdarymyz basqardy. 25 jyldyń ishinde «Ádilet» qoǵamy 20-ǵasyrdyń 20-50 jj. oryn alǵan stalınshildik solaqaı saıasat qasiretterin qarastyrýmen shuǵyldandy. Osy salada kúni búginge deıin 30 tomdaı kitapty jaryqqa shyǵardy. Elimizdiń barlyq oblystarynda jáne Almaty men Astana qalalarynda Azaly kitaptar jaryq kórdi. Keıbir oblystarda tipti 2-3 tomnan shyǵaryldy. Qýǵyn-súrginge ushyraǵandar men atylyp ketkenderdiń tizimi jasalyndy.
Qazir qýǵyn-súrgin qurbandarynyń barlyǵy qalmady deýge bolady. Olardyń balalarynyń ózderi de azaıyp bara jatyr. Búgingi áńgime bir jaǵynan «Ádilettiń» 25 jyldyq jumysyn qorytyndylaý bolsa, ekinshi jaǵynan onyń keleshegi jaıly pikir almasý jáne naqty usynystardy ortaǵa salý», - dedi «Ádilet» tarıhı-aǵartý qoǵamynyń tóraǵasy, fılologııa ǵylymdarynyń doktory Ǵarıfolla Ánes.
Aıta ketelik, búgingi konferentsııa sońynda qatysýshylar tıisti qarar qabyldaıdy.
