Almatydaǵy gospıtaldi salýǵa 5,5 mlrd teńge jumsalmaq
ALMATY. QazAqparat - Almatyda koronavırýsqa qarsy salynyp jatqan jańa gospıtaldiń qurylysyna 5,5 mlrd teńge bólinbek. Bul aqparatty jańa nysan týraly uıymdastyrylǵan press-týr barysynda BI Group Almaty kompanııasynyń dırektory Aıdos Muqataev aıtty, dep habarlaıdy QazAqparat tilshisi.
«Almatydaǵy qurylys jobasynyń quny 5,5 mlrd teńge shamasynda. Biz Openbook júıesimen jumys jasaımyz. Onda barlyq shyǵyndar kórsetiletin bolady. Qazir álemdik aýdıtorlyq kompanııalardyń qaısysymen jumys jasaıtynymyzdy anyqtap, kelisimshart júrgizip jatyrmyz. Bul jobanyń ózindik qunynyń aýdıti men operatsııalyq baqylaý qamtamasyz etiledi degendi bildiredi», - dedi Aıdos Muqataev.
Qazir Almatydaǵy gospıtaldiń qurylysyna 298 adam, 44 tehnıka jumyldyrylǵan. Qurylys qyzǵan kezde jumysshylar sany 500 adamnan asatyn bolady.
«Qurylysshylarǵa 600-700 orynǵa arnaıy hostel jaldadyq. Tamaqtandyrý úshin 10 shatyr daıyndaldy. Táýligine 24 saǵat jumys istep jatyrmyz», - dedi joba jetekshisi Arman Qabylhasov.
Qurylys jumystaryn 25 sáýirde aıaqtaý josparlanǵan.
Eske sala ketsek, munyń aldynda qurylys jumystary qalaı júrgizilip jatqanyn habarlaǵan bolatynbyz.
Aıta ketken jón, jańa gospıtal Alataý aýdanynda boı kóteredi. Sondaı-aq, qalalyq Qoǵamdyq densaýlyq saqtaý basqarmasynyń basshysy Tileýhan Ábildaevqa osy jobany qolǵa alǵan kompanııa ókilderimen birlesip gospıtalǵa asa qajetti qural-jabdyqtar máselesin de pysyqtaý tapsyryldy. Qala ákimi merdiger kompanııa ókilderine qolǵa alǵan barlyq jumysty sapaly ári ýaqytynda bitirýdi júktegen edi.
Gospıtal salý týraly sheshimdi koronavırýs ınfektsııasyna qarsy kúres maqsatynda qurylǵan QR Prezıdenti janyndaǵy tótenshe jaǵdaı rejimin qamtamasyz etý týraly Memlekettik komıssııa qabyldaǵan bolatyn.
Epıdemıologııalyq ahýaldy turaqtandyrý úshin mundaı nysandar Almaty, Shymkent, Nur-Sultan qalalarynda salynady.
