Almatydaǵy gospıtal basshylyǵy: Búginginiń batyrlary – aq halatty abzal jandar
ALMATY. QazAqparat – Búgin Qazaqstanda Medıtsına qyzmetkerleri kúni atap ótilýde. Almatydaǵy Otan soǵysy múgedekterine arnalǵan Respýblıkalyq klınıkalyq gospıtal ujymy da quttyqtaýlardan qalys qalmady. Mekemeniń 29 qyzmetkeri tós belgi taǵyp, alǵys hat aldy, dep habarlaıdy QazAqparat.
Mekeme basshysy Damır Dáýletbaev áriptesterin shyn júrekten quttyqtap, júrekjardy lebizin bildirdi.
«Bizdiń halyq basynan ne ótkizbedi? Sonaý asharshylyq zamanynda da ata-babalarymyz moıymady. Jerimizdi qorǵap, eline qorǵan bola bildi. Otan soǵysy jyldary men Aýǵan soǵysynda ot pen oqtyń ortasynda qan keshe júrip, kúresti. Qıyn-qystaý zamanda jaralanǵandardy arqalap, kómek kórsetip, janynyń arashashysy bola bilgen, árıne ol – medıtsına qyzmetkeri. Chernobyl apaty men Semeı polıgonynan zardap shekkenderge de eń alǵashqylardyń biri bolyp dárigerler kómek qolyn sozdy. Bıyl elimizde jarııalanǵan tótenshe jaǵdaı kezinde alǵy shepte aıanbaı eńbek etip júrgen de – dárigerler. Olaı bolsa, osy tól merekelerińizde sizder, qandaı ataqqa da, marapatqa da laıyqsyzdar. Eń bastysy, denderińiz saý, otbasylaryńyz aman bolsyn», - dedi ol.
Kesh sońynda gospıtal qyzmetkerleri merekelik án tyńdap, estelik sýretke tústi.
«Meniń dáriger mamandyǵyn tańdaý sebebim - anam 40 jyl ómirin medıtsınaǵa arnady, 40 jyl dáriger bolyp, eline qyzmet etti. Sodan oılana kele, joǵarǵy synypqa kóshken jyldary men de nege dáriger bolmasqa dep sheshim qabyldadym. Baǵym janyp, medıtsınalyq ınstıtýtqa oqýǵa tústim. Jalpy bizdiń otbasymyzdy «medıtsınalyq otbasy» dep ataýǵa bolady. Óıtkeni, búgingi tańda 8 dáriger barmyz. Kelin bar, qaryndasym bar, inim bar degendeı. Barlyǵy da medıtsınanyń bilikti mamandary», - dedi Otan soǵysy múgedekterine arnalǵan Respýblıkalyq klınıkalyq gospıtal dırektorynyń orynbasary Erlan Shahanuly.
Halqymyzdyń basyna túsken syn saǵatta, ıaǵnı tótenshe jaǵdaı jarııalanǵan kúnnen-aq, Damır Dáýletbaev basshylyq etetin Otan soǵysy múgedekterine arnalǵan Respýblıkalyq klınıkalyq gospıtal ujymy biraýyzdan kómektesýge bel sheshe kiristi.
«Dúnıejúzilik pandemııa bolyp jatqan tusta, bizde esh tańdaý bolmady. Naýqastardy qabyldap, kómegimizdi aıamaı, járdem bersek degen oıda boldyq. Qıynshylyqtar bolmady emes – boldy, túsinispeýshilikter de boldy. Eń alǵash Mysyrdan kelgen 100 adamnyń árqaısysy árqandaı oıda bolyp, elde bolyp jatqan tótenshe jaǵdaıdy túsinbedi. Karantın degendi bilmeıdi. Al keıbiri tipti, qoryqty. Eń qyzyǵy, keıbireýi bizdi qamap qoıdyńdar dep, qarsy shyǵyp, qorqytýǵa tyrysty. Biraq bizdiń qyzmetkerler bárin túsindi, saqadaı-saı daıyn turdy. Birinshi talap, kelip túskenderdiń kóńilin aýdara, panıkalyq sezimderin boldyrmaý jáne moraldyq turǵyda kómektesý boldy. Gospıtaldegi aýyzbirshilik tanytqan áriptesterime rızashylyǵymdy bildiremin. Halqymyzdyń senimin aqtadyq degen oıdamyn. Endi bolashaqta dárigerlerge senimsizdik tanytyp, syn aıtýshylardyń qatary azaıyp, kózqarastary ózgeredi dep oılaımyn. Ár dárigerdiń, ár qyzmetkerdiń orny bólek. Dárigerler orasan zor eńbek etti. Biraz adamnyń pandemııa kezinde kózi jetip, dárigerlerge degen senimi artqanyna senimdimin» - dedi gospıtal dırektorynyń orynbasary Erlan Shahanuly.
