Almatydaǵy gaz jarylysy: 19 jastaǵy boıjetkenniń jaǵdaıy asa aýyr
ALMATY. QazAqparat – Almatyda dárigerler Jetisý aýdanynda bolǵan gaz ben aýa qospasynyń jarylysynan zardap shekken adamdardyń jaǵdaıy týraly aıtty, dep habarlaıdy QazAqparat tilshisi.
Zardap shekken úsh adamnyń biri - 23 jastaǵy er adam aýrýhanadan shyǵýǵa daıyndalyp jatyr.
«Patsıent denesiniń 22% kúıik shalǵan. Qazirgi jaǵdaıy qanaǵattanarlyq. Aýrýhanadan shyǵýǵa daıyndalyp jatyr», - dedi qalalyq Qoǵamdyq densaýlyqty saqtaý basqarmasynan.
Al 19 jastaǵy boıjetkenniń jaǵdaıy asa aýyr.
«2000 jyly týǵan qyz áli de jansaqtaý bóliminde. Jaǵdaıy óte aýyr. Jasandy tynys alý apparatyna qosylǵan. Denesiniń 85%-y kúıgen. Qazir ótkir kúıik toksemııasy kezeńin basynan keshirip jatyr», - dedi basqarma.
Eske salsaq, qaıǵyly jaǵdaı Pervomaıka aýylyndaǵy Postyshev, 64 «V» mekenjaıynda barak tıptes 3 qabatty úıde bolǵan edi.
Saldarynan 3 adam jaraqat alyp aýrýhanaǵa túsken bolatyn. Denesiniń 100 %-yn kúıik shalǵan 36 jastaǵy er adam 2 kúnnen soń kóz jumdy.
