Almatydaǵy fıtnes jattyqtyrýshysy ólimine qatysy bar kúdikti Bishkekte ustaldy

BІShKEK. QazAqparat – Almatyda bolǵan fıtnes jattyqtyrýshy ólimine qatysy bar kúdikti Bishkekte ustaldy. Bul týraly Qyrǵyz Respýblıkasynyń ІІM-inen málim etti, dep habarlaıdy QazAqparat «Kabar» agenttigine silteme jasap.

Bir kún buryn Bishkektegi jekemenshik qonaqúılerdiń birinen 1992 j.t. A.B. esimdi kúdikti ustaldy. Oǵan Qazaqstannyń quqyq qorǵaý organdary QR Qylmystyq kodeksiniń 99-baby «Toptyq kisi óltirý» boıynsha izdeý jarııalaǵan.

«Alynǵan aqparatqa sáıkes, kúdikti óz áreketi úshin qylmystyq jaýapkershilikten jaltarý maqsatynda shekarany zańsyz kesip ótip, Bishkek qalasynyń aýmaǵynda jasyrynǵan. Qazaqstandyq áriptester Qyrǵyz Respýblıkasy Іshki ister mınıstrliginiń Qylmystyq izdestirý bas basqarmasyna tergeý organdarynan jasyrynyp júrgen adamdy izdestirý jáne ustaýǵa kómektesý týraly ótinishpen júgingen bolatyn», - delingen habarlamada.

Foto: kabar.kg

Kúdiktiniń tanymal klýbtyń 28 jastaǵy fıtnes jattyqtyrýshysyn atyp óltirýge qatysy bar ekeni anyqtaldy. Almaty qalasy Naýryzbaı aýdandyq polıtsııa bólimi 31 jastaǵy kúdiktige izdeý jarııalap, Almaty qalasynyń mamandandyrylǵan aýdanaralyq tergeý soty syrttaı qamaýǵa alýǵa sanktsııa shyǵarǵan.

Kúdiktiniń buǵan deıin de aýyr qylmys jasaǵany úshin jaýapqa tartylǵany belgili boldy. Qazir ol qamaýda otyr.

Eske salsaq, 19 shildege qaraǵan túni Almatyda «Fitness Blitz» klýbynyń fıtnes jattyqtyrýshysy Damır Tórebaevty óz páterinde atyp ketken.