Almatydaǵy evakýatsııa: Saýda ortalyǵynda kúmándi paket qaldyrǵan azamat ustaldy
ALMATY. QazAqparat – Almatyda saýda ortalyǵynda ornalasqan bankke kúmándi paket qaldyryp ketken er adam ustaldy, dep habarlaıdy QazAqparat tilshisi.
Medeý aýdandyq polıtsııa basqarmasynyń habarlaýynsha, pakettiń ıesi Almaty qalasynyń 22 jastaǵy turǵyny bolyp shyqty.
«Ustalǵan azamat pakettiń ózine tıesili ekenin birden rastady.Onyń aıtýynsha, qurylǵylardy ósimdik ósirý ádisterin jetildirý úshin qoldanyp júrgen. Ol turmystyq buıymdar salǵan paketin bank bólimshesinde umytyp ketken eken. Azamat A.-nyń keltirgen dáıekteri mindetti túrde qaıta tekseriledi. Atalmysh fakti QR Qylmystyq kodeksiniń 293-babynyń 1-bóligi boıynsha sotqa deıingi biryńǵaı tergeý tizilimine engizildi»,– dedi Medeý aýdandyq polıtsııa basqarmasynyń bastyǵy Bolat Totybaev.
Eske salaıyq, Nazarbaev dańǵylynda ornalasqan saýda ortalyǵyna kelýshiler kúdikti paketke baılanysty evakýatsııalanǵan bolatyn.
Al 10 aqpan kúni Almaty halyqaralyq áýejaıynan adamdar evakýatsııalanǵan edi. Oǵan sebep «102» nómirine jarylǵysh zat qoıylǵandyǵy týraly habardyń túsýi. Ǵımarat qorshaýǵa alynyp, tekserý jumystary júrgizildi. Aqparat rastalǵan joq. Polıtseıler jalǵan habar berdi degen kúdikpen 23 jastaǵy jigitti ustady. Ol qalalyq psıhonevrologııalyq dıspanserde esepte turady.
