Almatydaǵy epıdjaǵdaı: Turaqtandyrý qorynda 8 mln dári-dármek bar, 3 kópsalaly klınıka salynbaq
ALMATY. QazAqparat - Búgin elordadaǵy Ortalyq kommýnıkatsııalar qyzmetinde ótken baspasóz májilisinde Almaty qalasynyń ákimi Baqytjan Saǵyntaev shahardyń 10 aıdaǵy áleýmettik-ekonomıkalyq damýynyń qorytyndysy men memleket basshysynyń koronavırýs pandemııasyna qarsy sharalardy eńserý boıynsha qoıylǵan mindetterdi júzege asyrý barysy jóninde baıan etti. Sonymen qosa, qala ákimi shahardaǵy epıdjaǵdaıǵa toqtalyp, qalany damytý baǵytyndaǵy josparlarymen bólisti. Tolyǵyraq QazAqparat tilshisiniń materıalynda.
Almatydaǵy epıdjaǵdaı
Qala basshysynyń málimetinshe, bıýdjettiń shyǵys bóligi qaıta qaralǵan, óıtkeni konferentsııalar, dóńgelek ústelder, saltanatty, mádenı, ımıdjdi sııaqty buqaralyq sharalar barynsha azaıdy. Nátıjesinde, bıýdjet 30,8 mlrd teńgege ońtaılandyrylyp, únemdelgen qarjy epıdemııaǵa qarsy kúreske jumsalǵan.
Qazirgi tańda pandemııanyń jańa tolqynyna qýattylyǵy 7011 tósek-oryn bolatyn 23 kovıdtik statsıonar daıyndalǵan, jáne onyń ishinde 250 jansaqtaý bólimi baryn aıta ketken jón. Onyń dereginshe, barlyq klınıka úsh eshelonǵa bólingen. Bulardan ózge, sanatorıılerde, pansıonattarda jáne qonaq úılerde 1000-ǵa jýyq karantın sharalaryna arnalǵan oryn rezervte tur.
Sonymen qosa Baqytjan Saǵyntaev Almatyda pandemııa kezinde úsh jańa ınfektsııalyq statsıonar salynǵanyn eske saldy. Onyń ekeýi - modýldik klınıka jáne RV-90 gospıtali. Al, jeke ınvestıtsııa esebinen eki klınıka jóndeýden ótken. Taıaýdaǵy bes jylda Samuryq-Qazyna» AQ qatysýymen úsh kópsalaly klınıka salý josparlanǵan.
«Klınıkalardyń materıaldyq-tehnıkalyq bazasyn nyǵaıtý maqsatynda ótken jyly medıtsına uıymdaryn medıtsınalyq jabdyqtarmen modernızatsııalaýdyń úsh jyldyq baǵdarlamasy qabyldandy. Osyǵan oraı, bıyl 74 statsıonar men emhanaǵa 4197 jabdyq satyp alyndy, onyń ishinde 48 ÝZI apparaty, 31 rentgen, 236 ÓJJ, 4 KT jáne MRT apparattary bar. Jedel járdemniń 35 jańa kóligi satyp alyndy. 16 jeltoqsanǵa deıin taǵy 50 jańa kólik keledi. Al, 2021 jyldyń basynda taǵy 50 jańa kólik alamyz», - dedi ol.
Dári-dármekti turaqtandyrý qoryna 10 mlrd teńge bólindi
Buǵan deıin dári-dármek preparattarynyń Turaqtandyrý qory qurylǵan bolatyn. Oǵan 10 mlrd teńge bólingen, atap aıtqanda, 5 mlrd teńge - aýrýhanalar men emhanalardy dári-dármektermen qamtamasyz etýge, al 5 mlrd teńge – dárihanalarǵa jumsalǵan. Dári-dármekterdiń 68 ataýy boıynsha 8 mln azaımaıtyn qory qurylyp, sonymen qatar eki aıǵa jetkilikti JQZ qory bar. Budan ózge qýaty 982 myń birlikti quraıtyn medıtsınalyq maska óndirisi retke qoıylǵan.
Onyń aıtýynsha, Almaty ákimdigi iske asyratyn daǵdarysqa qarsy sharalar kesheni jumys oryndary men azamattardyń tabys kózin saqtaýǵa, ShOB qoldaýǵa, óndiristegi jańa tapsyrystardy yntalandyrýǵa baǵyttalǵan. 1 jeltoqsandaǵy jaǵdaı boıynsha, 77,6 myń jańa jumys orny, onyń ishinde 36,9 myń turaqty jumys orny qurylǵan. Al kásipkerlik sýbektileri 29,8 myń jumys ornyn ashqan.
Shahar basshysynyń málimetinshe, 2020 jyly barlyǵy 2 mln 396 myń sharshy metr turǵyn úı paıdalanýǵa berilgen.
- «Nurly Jer» memlekettik baǵdarlamasy boıynsha 5 206 páter paıdalanýǵa beriledi
- «7-20-25» jeńildikpen ıpotekalyq kredıt berý baǵdarlamasy arqyly 5 605 páter (76,5 mlrd teńge) nemese respýblıka boıynsha árbir 5-shi ótinim maquldanǵan
- «Shańyraq» jeńildetilgen kredıt berý baǵdarlamasy qolǵa alynǵan
- «Almaty Jastary» jeńildikpen ıpotekalyq kredıt berý jónindegi qalalyq baǵdarlama boıynsha 1 myń jas otbasy bastapqy jáne ekinshi naryqta páter ala alady.
ShOB-ty qoldaý
Qala ákiminiń sózinshe, osy jyldyń basynda shaǵyn jáne orta bıznesti qoldaý men damytýdyń «Almaty Business-2025» óńirlik baǵdarlamasy iske qosylǵan. Osy baǵdarlama aıasynda ótken jyldyń sońynda «Almaty Finance» jáne «Almaty» mıkroqarjy uıymy» qurylǵan ınstıtýttary jumys istep jatyr. Olar qoldanystaǵy bıznesti jáne startap jobalardy jeńildetilgen nesıemen qarjylandyrady. Bul maqsattarǵa 12,2 mlrd teńge bólindi. Búginde 8,3 mlrd teńgege 84 joba qarjylandyrylǵan.
Azyq-túlik qaýipsizdigin qamtamasyz etý
Baqytjan Saǵyntaevtyń málimetinshe, Turaqtandyrý qoryn tolyqtyrýǵa jergilikti bıýdjetten 7 mlrd teńgeden astam qarajat bólingen. 44,6 myń tonna áleýmettik mańyzy bar azyq-túlik taýarlarynyń 16 túrin jelilik marketterge jetkizilgen. Jyldyń basynan beri Almatyda áleýmettik mańyzy bar azyq-túlik taýarlarynyń 19 túriniń 7-eýi boıynsha baǵa ındeksi 100%-dan tómen bolǵan.
Halyqtyń osal toptaryn qoldaý sharalary
Sonymen qosa, onyń sózinshe, halyqtyń osal toptaryn qoldaý úshin arnaıy sharalar paketi qabyldanǵan.
««Іsker Ana» baǵdarlamasy iske asyrylýda, onda aýdandyq «Baqytty otbasy» ortalyqtarynyń bazasynda «Eńbek» memlekettik baǵdarlamasy aıasynda kásipkerlik negizderine oqytady. Kóp balaly otbasylardan 888 adam 555 myń teńgege deıin granttar aldy. Sonymen qatar, 406 mln teńge somasyna 203 kópbalaly ana 5 mln teńgege deıingi granttar aldy. Búgingi tańda kópbalaly jáne az qamtylǵan otbasylardyń mektep jasyndaǵy balalary kompıýterlik tehnıkamen tolyq qamtamasyz etildi», - dedi qala ákimi.
