Almatydaǵy epıdemııalyq ahýal kúrdeli - ákimdik
Bıyl 3 qańtardaǵy jaǵdaı boıynsha Almatydaǵy epıdemııalyq ahýal kúrdeli bolyp otyr. Almaty qalasy Sanıtarlyq-epıdemıologııalyq baqylaý departamenti basshysynyń orynbasary Ásel Qalyqova Almatynyń «sary aımaqta» ekenin atap ótti.
Onyń aıtýynsha, 2020 jyldyń basynan beri qala aýmaǵynda koronavırýs ınfektsııasyn juqtyrýdyń 18 myńnan astam oqıǵasy, sonymen birge, anyqtalmaǵan pnevmonııanyń 1423 oqıǵasy tirkelgen.
Jeltoqsan aıynda KVI-nyń 2256 oqıǵasy tirkeldi. Jeltoqsan qorytyndysy boıynsha epıdemıologtardyń júrgizgen zertteýleri ınfektsııany juqtyrǵandar arasynda 20-dan 60 jasqa deıingi azamattar áldeqaıda basym ekenin kórsetken. 4 aptada aýyrǵandardyń 64 paıyzy sol jastaǵylar bolǵan.
Almatyda qoǵamdyq oryndar, onyń ishinde dúkender, dárihanalar, qoǵamdyq tamaqtaný obektileri, SOO jáne bazarlar ınfektsııa eń kóp juǵatyn oryndar bolyp otyr. Syrqattanǵan adamdardyń kópshiligi saýda úıleri, dúkender, dárihanalar, SOO, qoǵamdyq tamaqtaný oryndary, bazarlar, medıtsınalyq uıymdarda juqtyrǵan. Onyń ishinde otbasylyq is-sharalarda (39%), otbasynyń naýqas múshelerimen baılanysta (35%) jáne qalalyq kólikte (17%) kóp juqtyrý deregi tirkeldi.
«Ótken táýlikte qala boıynsha juqtyrýdyń 100-den astam oqıǵasy tirkeldi. Olardyń ishinde 30 paıyzynda aýrý klınıkalyq sımptomsyz ótýde. Osyǵan baılanysty, qala turǵyndarynyń nazaryn karantın sharalaryn saqtaýdy jalǵastyrýǵa nazar aýdarýǵa shaqyramyz. Qala turǵyndary men qonaqtaryna múmkindiginshe qoǵamdyq oryndarǵa barýdan bas tartyp, dúkenderde, SOO, bazarlarda jáne qoǵamdyq basqa da oryndarda áleýmettik qashyqtyq saqtaý usynylady. Sondaı -aq, betperde taǵýdy jalǵastyryp, olardy taǵýdyń jáne aýystyrýdyń erejesin saqtaý kerek»,- dedi Ásel Qalyqova.
