Almatydaǵy eń qaýipti jol bóligi anyqtaldy
ASTANA. QazAqparat - Qazaqstan boıynsha jol-kólik oqıǵalarynyń eń kóbi Almatyda bolyp jatady. Mundaı málimetterdi QR Bas prokýratýrasynyń Quqyqtyq statıstıka jáne arnaıy esep komıtetiniń baspasóz qyzmeti jarııa etti, dep habarlaıdy QazAqparat.
«Bıylǵy jyldyń eki aıynda respýblıka joldarynda 2 myń 59 jol-kólik oqıǵasy tirkelip, onyń saldarynan 2 myń 955 adam zardap shekti. 117 adam qaıtys boldy. Ótken aıda jol-kólik apattarynyń eń kóbi - 596 Almatyda boldy»,-delingen habarlamada.
Bul rette apat eń kóp oryn alǵan jer - Almatydaǵy Sh.Qaldyaıaqov pen Tóle bı kóshesine deıingi aralyq bolyp otyr. Onda 21 jol-kólik oqıǵasy oryn alyp, onda 12 adam zardap shekti jáne 2 adam qaza boldy. Jol-kólik apattarynyń qurbany bolǵandar jaǵynan Almaty oblysy alda tur. Bul aımaqta 54 adam kóz jumǵan.
Sonymen qatar eń aýqymdy jol-kólik oqıǵasy da bıylǵy jyly Almaty oblysynda oryn aldy. 3 aqpan kúni Almaty oblysynyń Alakól aýdanynda qarasty Terekti aýylynda «Hyndai Sanata» markili avtokóliginiń júrgizýshisi aýyldan shyǵar jolda kólikti ıgere almaı qalyp, batysqa qaraı jyljyp bara jatqan «Mersedes-Benz» markili kóligimen betpe-bet soǵysqan.
Osy oqıǵanyń saldarynan 8 adam zardap shegip, 4 adam mert boldy. Bıylǵy jyldyń eki aıynda Ákimshilik quqyqbuzýshylyq kodeksiniń 610 baby boıynsha (kólik júrgizýshileri tarapynan belgilengen jolda júrý erejelerin buzýdyń saldarynan adamdardyń densaýlyǵyna zııan keltirý, kólik quralyna nemese jeke múlikke zııanyn tıgizý) 7 myń 768 adam, jaýapqa tartylyp, olaryń 7 myń 198-ine 162,9 mln teńge kóleminde aıyppul salyndy. 565 adam kólik júrgizý quqynan aıyrylyp, 4 adamǵa qatysty ákimshilik qamaýǵa alý sharasy qoldanyldy. 262 azamatqa qatysty arnaıy quqyqtardan aıyrý turindegi qosymsha jaýapqa tartý sharasy qoldanyldy.
Bıylǵy jyly 828 qylmystyq quqyqbuzýshylyqtar tirkelip, 124 adamnyń isi sotqa joldandy.
