Almatydaǵy emhana men aýrýhanalarǵa 19 mln teńgeden astam aıyppul salynǵan
ALMATY. QazAqparat - Medıtsınalyq saqtandyrý qory bıylǵy jyldyń birinshi toqsanynda respýblıka turǵyndaryna kórsetilgen tegin medıtsınalyq kómektiń sapasyn baqylaý nátıjesin qorytyndylady. Monıtorıng nátıjesinde Almaty qalasy boıynsha 116 mln teńgeden astam qyzmettiń túrli kemshiliktermen kórsetilgeni belgili boldy. Bul týraly «Áleýmettik medıtsınalyq saqtandyrý qory» KEAQ Almaty fılıaly habarlady.
Keltirilgen derekterge qaraǵanda, kemshiliktiń basym bóligi statsıonarlyq jáne statsıonardy almastyratyn kómek uıymdaryna tıesili. Monıtorıng nátıjesinde olardan 96,5 mln teńgeden astam qarjy qaıtaryp alynǵan. Konsýltatıvtik-dıagnostıkalyq kómek uıymdary kórsetken qyzmetten 429 myń teńgeniń kemshiligi tabyldy. Al, emhanalar men ambýlatorııalarǵa 704 myń teńge aıyppul salyndy.
Almaty qalasy boıynsha emhanalar men aýrýhanalarǵa salynǵan aıyppuldyń jalpy somasy 19 mln teńgeden asyp jyǵylady. Jalpy, respýblıka boıynsha birinshi toqsanda 1,5 mlrd teńgeniń kemshiligi anyqtalǵan.
«Monıtorıng barysynda anyqtalǵan kemshilikterdiń deni emdeý-dıagnostıka sharalaryn júrgizý barysynda belgilengen standarttardan aýytqý, medıtsınalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa kelip saıady. Sonymen qatar, kórsetildi dep jazylǵan belgili bir qyzmet túrleriniń shyn máninde kórsetilgenin rastaı almaǵan klınıkalar da bar», - dedi MSQ Almaty fılıalynyń Medıtsınalyq qyzmet sapasyn baqylaý bólimi basshysy Ásem Manapbaeva.
Onyń aıtýynsha, qazirgi tańda monıtorıng menshik quqyǵyna qaramastan, memlekettik tapsyrys alǵan barlyq medıtsına uıymdarynda júrgiziledi. Jyl basynan beri saraptamanyń úsh deńgeıli úlgisi qoldanysqa engizildi. Naqtyraq aıtqanda, adam ólimi bolǵan jaǵdaıda saraptama emhanalyq-ambýlatorlyq kómek, jedel járdem jáne statsıonar deńgeıinde (syrqattyń em-dom alý úshin júrip ótken marshrýty boıynsha) jasalyp, jiberilgen kemshilikterdiń ózara baılanysy anyqtalady.
Esterińizge sala ketsek, Almaty qalasynda 184 medıtsına uıymy memlekettik tapsyrys sheńberinde halyqqa tegin kómek kórsetip jatyr. Olarmen bekitilgen kelisimsharttyń jalpy somasy 105 mlrd teńgeden asady.
