Almatydaǵy ekinshi jylý elektr ortalyǵynyń jańa qondyrǵylar iske qosylyp, jylý qýaty kóbeıdi
ALMATY. Qazannyń 19-y. QazAqparat /Erbol Turymbetov/ - Keshe Almaty qalasynyń ákimi Ahmetjan Esimov qaladaǵy 2-nshi jylý elektr ortalyǵynyń tsehtary men bólimshelerinde bolyp,
bıylǵy maýsym basyndaǵy jalpy jaǵdaıdy, ákimshilik tarapynan kórsetiler kómekterdi surastyrdy. Osy tsehtardy basqaryp otyrǵan operatorlyq júıedegi jańadan qoıylǵan qondyrǵylardyń jumys isteý úrdisimen tanysqan Ahmetjan Smaǵululy Germanııa men Reseı ónimderine oń baǵasyn berdi.
«1970-1980 jyldary salynǵan qurylǵylar osylaısha qaıta jóndeýdi bastan keshirip, energııa, jylý óniminde birshama alǵa ilgerileý jasamaq. Osy qadamnyń arqasynda bıylǵy qysqy maýsymdy qala turǵyndary qoryqpaı qarsy alýlaryna bolady», - dedi A. Esimov. Onyń aıtýynsha, qala turǵyndary qystyń kúni jylýdan eshqandaı tarshylyq kórmeýine barlyq jaǵdaılar jasalýda.
Qazannyń 14-i kúni jylytý maýsymynyń bastalýyna oraı 2-nshi jylý elektr ortalyǵynyńbasshylyǵy barlyq qondyrǵylar men tsehtardyń jańartylǵan bólshekterin synaqtan ótkizgen bolatyn. Sonymen qatar tsehtardyń ónimdiligi men kúsh-qýatyn arttyrý maqsatynda jylý óńdeıtin gradırlik aınalmaly qurylǵy ornatylǵan-dy.
Endi jańa qurylǵylar kómegimen atalmysh ortalyqtyń jumysy odan ári ulǵaıyp, jylý qorytý jáne óńdeý máselesinde kúsheıe túspek. Qondyrǵy sý qoryn býǵa aınaldyryp, kondensat retinde qatyrady. Osydan keıin jylý ónimi 1147 Gkalǵa kóbeıedi.
«Bul tektes qondyrǵylardyń jóndeý kórmegenine 30 jyl bolǵan edi. Biz osy maýsymnyń aldynda barlyǵyn rettep, jumys barysyn bir úrdiske keltirdik. Sondaı-aq jańa, eshqandaı qaldyq qaldyrmaıtyn qurylǵyny da qoıyp otyrmyz. 7 ańǵar, 6 qazandyq da tolyqtaı jóndeýden ótti. Al sońǵy qazandyq qarashanyń 4-i kúni daıyn bolady», - dedi Almaty ekinshi jylý elektr ortalyǵynyń basqarýshy dırektory Beısembek Sabyrqulov.
Jańadan salynǵan 2 bólikti gradır elektr qýattylyǵyn 75 MVt-qa kúsheıtip, qystyń kúngi jumysty jeńildetedi dep kútilýde. Osynyń arqasynda jylyna 453 mln. kVt/s elektr energııasyn óndirip, qalany bul jóninde esh alańdaýsyz qamtamasyz ete alatyn deńgeıge jetedi.
