Almatydaǵy dúkende áıeldiń omyraýyn ustaǵan er adam Atyraýda ustaldy
Atyraý oblystyq polıtsııa departamentiniń baspasóz qyzmetinen málim etkendeı, oqıǵa 18 tamyz kúni Almaty qalasyndaǵy sýpermarketterdiń birinde bolǵan.
«Áıel adamnyń omyraýyna qolyn salǵan er adam Atyraý qalasynan anyqtalyp, ustaldy. Atyraý qalasynyń 1988 jylǵy turǵyny óz kinásin tolyqtaı moıyndady. Ol alkogoldik mas kúıde mundaı óreskel áreketke barǵan. Quqyq buzýshylyq áreketi úshin er adam QR Ákimshilik quqyq buzýshylyq týraly kodeksiniń 434-babymen (Usaq buzaqylyq) 5 táýlik ákimshilik qamaýǵa alyndy», -dep habarlady departamenttiń baspasóz qyzmeti.
Eske sala ketelik, budan buryn Atyraýda burynǵy áıelin uryp, belgisiz baǵytqa áketken er adam ustalǵanyn habarlaǵan bolatynbyz.
Er adam burynǵy áıelin uryp-soǵyp, kólikke súırep mingizip, belgisiz baǵytqa alyp ketken. Bul týraly oqıǵa kýágerleri 102 arnasyna qońyraý shalyp, habar bergen.
«Polıtsııa qyzmetkerleri kúdikke ilingen Honda avtokóligin Atyraý-Qarabatan tasjolynyń boıynan toqtatty. Alaıda, kóliktiń 1987 jylǵy júrgizýshisi polıtsııa qyzmetkerlerine qarsylyq tanytyp, zańdy talabyna baǵynbaǵan. Al 1988 jylǵy áıel burynǵy kúıeýiniń ózin uryp-soǵyp, dene jaraqatyn salǵanyn, erkinen tys kólikpen belgisiz baǵytqa alyp bara jatqanyn málimdedi. Tekserý kezinde kólik júrgizýshisiniń buryn sotty bolǵany, destrýktıvti dinı aǵym ókili ekeni anyqtaldy», - dep málim etken edi departamenttiń baspasóz qyzmeti.
