Almatydaǵy dóńgelek ústelde memlekettik qyzmetshilerdiń Ádep kodeksi túsindirildi (FOTO)
ALMATY. QazAqparat - Almaty qalasynyń ákimdiginde QR Memlekettik qyzmet isteri mınıstrliginiń Almaty qalasy boıynsha departamentiniń uıymdastyrýymen «Jańa kásibı standart» taqyrybynda dóńgelek ústel ótkizildi.
Oǵan Almaty qalasy ákimi apparatynyń qyzmetkerleri, qala basqarmalarynyń basshylary, sondaı-aq, bıznes qurylymdardyń, úkimettik emes uıymdardyń ókilderi jáne memlekettik qyzmet ardagerleri qatysty.
Óz baıandamasynda Departament basshysy Baqtııar Kamalov Elbasy Nursultan Nazarbaevtyń «Qazaqstan Respýblıkasy memlekettik qyzmetshileriniń ádeptilik normalaryn jáne minez-qulyq qaǵıdalaryn odan ári jetildirý jónindegi sharalar týraly» 2015 jylǵy 29 jeltoqsandaǵy №153-shi Jarlyǵymen bekitilgen QR memlekettik qyzmetshileriniń Ádep kodeksin jáne ádep jónindegi ýákil týraly Erejesin qatysýshylarǵa túsindirdi.
«Merıtokratııa, tıimdilik jáne qoǵamǵa esep berýshilik qaǵıdattaryna negizdelgen qazirgi zamanǵy memlekettik apparatty qalyptastyrý jáne damytý úshin memlekettik qyzmetshiler ózderiniń kásibı biliktiligin únemi arttyryp otyrýlary qajet.
Bul Ádep kodeksi memlekettik qyzmetkerlerdiń qyzmette jáne kúndelikti ómirdegi júris-turystarynyń jańa standartyn bekitti. Sonyń negizinde endi memlekettik organdarda etıka boıynsha arnaıy ýákilder jumys isteıtin bolady. Olal ádeptilik normalardyń saqtalýyn qadaǵalaıdy», - dedi B. Kamalov.
Óz kezeginde Qazaqstan kásipkerleri forýmynyń atqarýshy dırektory Mýnavara Paltasheva jańa Ádep kodeksi megapolıste qolaıly ınvestıtsııalyq ahýal qalyptastyrýǵa, bıznes sektorymen memlekettik organdardyń ózara tereń árekettestigin qamtamasyz etýge septigin tıgizetindigin atap ótti. Onyń aıtýynsha, memlekettik qyzmetshilerdiń eńbekaqysyn aımaqtaǵy bıznestiń damý deńgeıimen ushtastyrý qajet.
Al, Almaty aımaqtyq memlekettik qyzmetshilerdi qaıta daıarlaý jáne biliktiligin arttyrý ortalyǵynyń dırektory Ábiken Toqtybekov memlekettik qyzmetshilerdiń qyzmetten tys ýaqyttaǵy júris-turysy, minez-qulqy qoǵamnyń memlekettik organdarǵa degen senimine áser etetindigin jetkizdi. Sondyqtan, onyń pikirinshe, árbir memlekettik qyzmetker qaı kezde bolmasyn joǵary moraldyq ádep normalaryn saqtaýlary tıis. 
