Almatydaǵy daýyl: 36 tal qulaǵany týraly habar tústi
ALMATY. QazAqparat – Almatyda ekpindi jel, jaýyn-shashyn men qar aralas jańbyr saldarynan qala aýmaǵynda aǵashtar men butaqtardyń qulaý faktileri tirkeldi, dep habarlaıdy QazAqparat Almaty qalasynyń Tótenshe jaǵdaılar departameniniń baspasóz qyzmetine silteme jasap.
Baspasóz qyzmetiniń málimetterine qaraǵanda, tabıǵattyń dúleı kúshiniń saldaryn joıý jumystaryn aýdandyq ákimdikterdiń merdiger uıymdary men Almaty qalasynyń qutqarý qyzmeti júzege asyryp jatyr.
29 naýryz kúngi saǵat 19:00-degi jaǵdaı boıynsha «112» jelisine aǵash qulaýǵa qatysty 36 qońyraý kelip túsken. 31 aǵash, 5 úlken buta qulaǵan, onyń ishinde 21 aǵash kólikterge qulaǵan.
Pýlttik monıtorıng qyzmetiniń aqparatyna sáıkes, butaq qulaýynan 1 eresek adam bolmashy dene jaraqatyn alǵan.
Barlyq tirkelgen jaǵdaı boıynsha aýdandyq tótenshe jaǵdaı bólimderi, aýdandyq ákimdikterdiń merdiger uıymdary men Almaty qalasynyń qutqarý qyzmeti jumys istep jatyr.
Jasyl ekonomıka basqarmasynyń aqparatyna sáıkes Almatyda 2,8 mln tal bolsa, onyń 84,6 myńy shirip, qulaǵaly tur.
Júrgizilgen saraptamaǵa sáıkes, negizinen qaýipti aǵashtar qalanyń ortalyq jáne shet aımaqtarynda tur.
«Aýdan ákimdikteriniń apparattary men Jasyl ekonomıka basqarmasy birlese otyryp qaýip týdyryp otyrǵan aǵashtardy kesip, ornyna jas taldar otyrǵyzyp, qalanyń jasyl qoryn qalpyna keltirý jumystaryn júrgizip keledi»,-delingen habarlamada.
