Almatydaǵy dárixana zańdy buzǵany úshin bir kúnge jabyldy
ASTANA. QazAqparat - Almatydaǵy dárixana zańdy buzǵany úshin bir kúnge jabyldy. Budan bólek, memlekettik tirkeýden ótpegen dárini satqany úshin jeke menshik fırmaǵa jarty mıllıon teńge kóleminde aıyppul salyndy, dep xabarlaıdy QazAqparat tilshisi Astana qalalyq sotynyń resmı saıtyna silteme jasap.
Sot úkimine sáıkes, Almaty qalasy Gogol kóshesi 155 úıde ornalasqan «P.E.» JShS-niń dárihanasyn tekserý kezinde Qazaqstan Respýblıkasynyń aýmaǵynda tirkelmegen jáne memlekettik tirkeýden ótpegen dári-dármekter anyqtalǵan. Barlyǵy - MUCOS Pharma CZ SRO-nyń ónimderi. Atalǵan preparattar eshqandaı qujatsyz ákelingen. Sondaı-aq, Qazaqstan Respýblıkasynyń zańnamasy boıynsha qaýipsizdik pen sapany retteý qortyndysymen bekitilmegen bolyp shyqty.
"Sot otyrysynda «P.E.» JShS dırektory P. óz kinásin tolyq moıyndap, atalǵan taýardan eshqandaı kiris paıdasyn jasamaǵanyn, sonymen-qatar dári óziniń jeke qajettiligi úshin alynǵanyn jetkizdi. Sot qaýlysymen «P.E.» JShS-i ákimshilik quqyq buzýshy bolyp tanylyp, oǵan 453 800 teńge kóleminde (200 aılyq eseptik kórsetkish) aıyppul salynyp, 1 kún qyzmetin toqtata turý jáne dári-dármek ónimderin tárkileý ákimshilik jazasy taǵaıyndaldy. Qaýly zańdy kúshine engen joq", - delingen sot úkiminde.
