Almatydaǵy dámhanada órt shyǵyp 30 adam evakýatsııalandy
ALMATY. QazAqparat - Almatydaǵy dámhanada órt shyqty, bul týraly qalalyq TJD-nyń resmı ókili Sandýǵash Baımuhambetova málim etti.
«Saǵat 04.12-te Almaty qalalyq TJD «101» qyzmetiniń pýltine Alataý aýdany Emtsova kóshesindegi «Leıla» dámhanasynda órt shyqqany jóninde qońyraý soǵylǵan. Sol jerge órt sóndirýshiler 5 mınýttan soń kelip jetken. Dámhananyń birinshi jáne jáne ekinshi qabatynyń arasyndaǵy tóbe jabyndysy otqa oranǵan. Órt sóndirýshiler jalynnyń dámhanadan eki metr jerde turǵan bir qabatty aǵash ǵımaratqa taralyp ketýine jol bermedi. Órt saǵat 04.40-ta oqshaýlanyp, saǵat 04.46-da tolyq óshirildi. Jalyn 120 sharshy metr aýmaqqa zardap keltirgen. Sol jerden 30 adam evakýatsııalandy», - delingen habarlamada.
Oqıǵadan eshkim zardap shekpedi.
