Almatydaǵy tsement zaýytynda jarylys boldy
ALMATY. QazAqparat - Almatydaǵy tsement zaýytynda tótenshe jaǵdaı oryn aldy, dep habarlaıdy QazAqparat tilshisi.
Bul týraly áleýmettik jelide ekobelsendi Saltanat Tashımova jazdy.
Almaty qalalyq ekologııa departamenti aqparatty rastady.
Departamenttiń málimetinshe, 7 maýsym kúni keshki saǵat 20.00 shamasynda Pavlodarskaıa 48 kóshesinde ornalasqan óndiristik bazasynda tsement tasıtyn kólikten shıkizatty syǵyndy ydysqa aıdaý kezinde tótenshe jaǵdaı oryn alǵan. Oǵan sebep - tsement tasıtyn mashınanyń shlangisi joǵary qysymǵa shydamaı, jarylǵan.
«Ekologııa departamentiniń qyzmetkerleri tótenshe jaǵdaı oryn alǵan jerge baryp, zaýyt aýmaǵynan synamalar aldy. Onyń nátıjesi aýaǵa jaıylǵan shańnyń ruqsat etilgen shoǵyrlaný normatıvterinen asyp ketkenin kórsetti. Jospardan tys tekserý júrgiziledi. Onyń nátıjesi týraly qosymsha habarlanady», - dep málim etti departamenttegiler.
Qazirgi ýaqytta, memlekettik ekologııalyq saraptamanyń 2018 jylǵy qorytyndysyn qaıtaryp alý týraly sot óndirisi júrip jatyr.
«Almaty qalasy boıynsha Ekologııa departamentiniń sotqa deıin jetkizbeı máseleni sheshý týraly haty negizinde qalanyń Jasyl ekonomıka basqarmasy memlekettik ekologııalyq saraptamanyń qorytyndysynan aıyrý (qaıtaryp alý) týraly mamandandyrylǵan aýdanaralyq ekonomıkalyq sotyna talap aryzben júgindi. 2018 jylǵy 16 qarashadaǵy «Óndiristik baza» úshin shyǵaryndylar normatıvteri (maksımaldy ruqsat etilgen shyǵaryndylar)» jobasy boıynsha shyǵarylǵan jáne qorshaǵan ortaǵa emıssııalardyń kúshin joıý talap etiledi. Qazirgi ýaqytta sot protsesteri júrip jatyr», - delingen Ekologııa departamenti taratqan habarlamada.
