Almatydaǵy Býtakov shatqalynda 8 gektar aýmaqtyń aǵashy kesiledi
ALMATY. QazAqparat - Almatydaǵy Býtakov shatqalynda 8 gektardan astam aýdandaǵy aǵashty butaý jumysy júrgiziledi, dep habarlaıdy QazAqparat tilshisi.
«Ótken jyly aǵashtardy kesýge qatysty moratorıı alynyp tastaldy. Býtakov shatqalynda aǵashtar (kesýge josparlanǵan - red.) aýyryp, qýraýǵa aınalǵan. Olar 60-jyldary otyrǵyzylǵan eken. Mysaly, Býtakovtaǵy eýropalyq shyrshanyń qýrap qalǵanyn kórýge bolady. Shabylǵan aǵashtardyń ornyna biz 4 165 jańa kóshet egemiz. Barlyǵy 34 500 aǵash otyrǵyzylady. Aǵashtardy kesýge ruqsat alýdyń barlyq kezeńinen ótkennen keıin mynadaı jumystar júrgizemiz dep josparlap otyrmyz: 2019 jyly aǵashtardy kesýdi bastaımyz, 2020 jyly jer daıyndalady, 2021 jyly kesilgen aǵashtardyń ornyna jańa kóshetter egiledi», - dedi Іle-Alataý ulttyq tabıǵı parki bas dırektorynyń orynbasary Darhan Isabekov.
Sonymen qatar, Shymbulaqqa qaraı elektr jelisiniń boıyna ósken aǵashtar butalady. Darhan Isabekovtiń aıtýynsha, olardy kesýdi «Alataý jaryq» kompanııasy suraǵan.
Sondaı-aq ol, kesilgen aǵashtardyń barlyǵy ulttyq parktiń qajettiligine jaratylady. Eger artylyp jatsa, olar satylady. Qazirgi tańda naryqta aǵash otynnyń 1 tekshe metri 3 000 teńge turady.
