Almatydaǵy burynǵy temirjol aýrýhanasy balalardy ońaltý ortalyǵy bolady
ALMATY. QazAqparat - Almatyda burynǵy temirjol aýrýhanasynyń ǵımaratynda balalardy ońaltýdyń qalalyq ortalyǵy ashylady. Bul týraly Almaty ákimi Erbolat Dosaevtyń Almaly aýdanynyń turǵyndarymen kezdesý kezinde aıtty, dep habarlaıdy QazAqparat tilshisi.
Kezdesý kezinde aýdan turǵyny burynǵy temirjol aýrýhanasyna qatysty suraq qoıdy.
«Aýrýhana qalanyń menshigine ótkeli beri qaraýsyz tur. Esik, terezeleri joq. Qorqynyshty jaǵdaıda. Almaly aýdanynyń ákimdigi buǵan deıin onda ońaltý ortalyǵy salynatynyn habarlaǵan edi. Biraq ázirge jumystar júrgen joq, ǵımarat qańyrap bos tur. Bul almatylyqtar úshin mańyzdy ǵımarat ekenin eskersek, ony retke keltirýdi suraımyn», - dedi qala turǵyny.
Almaty ákimi Erbolat Dosaev tarıhı ǵımarattyń erekshe nazarda turǵanyn aıtty.
«Bul joba boıynsha kelisim alý, ony «Qazrestavratsııamen» qalpyna keltirýge biraz ýaqyt ketti. Keıin bizdiń jobamyz maquldandy jáne búginde jobalyq-smetalyq qujattama ázirlenýde. Kelesi jyly jumystar bastalady. Jobaǵa qarajat bólindi. Ol jerde rasymen balalarǵa arnalǵan qalalyq ońaltý ortalyǵy ashylatyn bolady. Barlyq jumystar Almaty qalasynyń damý josparyna sáıkes júredi. Nysannyń tarıhı kelbetin qalpyna keltirýdi ózim qadaǵalaımyn, al ortalyqtyń ishin zamanaýı jabdyqtarmen jabdyqtap, balalarǵa qolaıly jaǵdaı jasaımyz», - dedi Erbolat Dosaev.
