Almatydaǵy búlingen mýraldy tanymal sýretshi qalpyna keltirdi
ALMATY. QazAqparat - Almatyda jóndeý jumystary kezinde búlingen «Álemderdi biriktire otyryp» mýraly qaıta qalpyna keltirildi, dep habarlaıdy QazAqparat tilshisi.
Qala turǵyndary men qonaqtarynyń kózaıymyna aınalǵan ál-Farabı dańǵyly, 127 – Úlken Almaty ózeni mekenjaıynda ornalasqan «Álemderdi biriktir» mýralyn tanymal sýretshi Arystanbek Shalbaev qalpyna keltirdi.
«Mýral-art pen graffıtı - kóshe óneriniń óte uqsas túri bolǵanymen, olardyń arasynda aıtarlyqtaı aıyrmashylyq bar. Sebebi mýraldar ádemi sýretpen qatar qandaı da bir tereń oı nemese maǵyna berýge arnalǵan. Osylaısha, bul sýretterdiń ómirden alynatyn nemese mıfologııadan ártúrli kórinis beınelengen klassıkalyq freskalarmen uqsastyǵy áldeqaıda kóp. Osyǵan qarap, mýraldar freskalardyń evolıýtsııalanǵan formasy degen tujyrym jasaýǵa bolady. Sonymen qatar, mýral jasaý bılikpen kelisilgen áreket negizinde júzege asady. Árıne, mýraldardy búldirý kóńilge qaıaý túsiredi, sondyqtan men Tikkurila kompanııasynyń «Álemderdi biriktire» mýralyn qaıta qalpyna keltirý usynysyna qýana kelistim», - dedi Arystanbek Shalbaev.
«Álemderdi biriktire otyryp» mýralyn 2015 jyly Qyrǵyzstan sýretshileriniń tandemi – Doxa Art toby (Dmıtrıı Petrovskıı, Sergeı Keller) salǵan bolatyn. Óz kezeginde qala bıligi de - mýral salý jónindegi jobanyń belsendi qatysýshysy. Turǵyn úı qabyrǵalarynyń eń qyzyqty jáne estetıkalyq tartymdy jumystarmen bezendirilýi úshin ákimdik janyndaǵy arnaıy komıssııa bazasynda eskızderdi kelisý arqyly mýral salýǵa ruqsat beriledi.
Almatyda birneshe jyl qatarynan jarqyn strıt-art nysandarynyń festıvali ótedi. Qazirgi ýaqytta qalada otandyq jáne sheteldik sýretshiler salǵan 30-dan astam úlken qabyrǵa sýretteri bar.
