Almatydaǵy Botanıkalyq baq qalaı ózgeredi
ALMATY. QazAqparat - Almatynyń kórnekti oryndarynyń biri - botanıkalyq baqtyń qalaı túrlenetini belgili boldy. Búgin qoǵamdyq keńeste ótken jıyn barysynda nysandy qaıta qurý eskızi kópshilikke tanystyryldy, dep habarlaıdy QazAqparat tilshisi.
«Vernyı kapıtal» kompanııalar tobynyń dırektor Erlan Ospanov jobanyń kontseptýaldy sheshimin túsindirdi.
Aıta ketý kerek, bul joba Bolat Ótemuratovtyń qorynyń bastamasymen qolǵa alynǵan.
«Bolat Ótemuratov Almatynyń sońǵy ýaqytta qalaı túrlengenin atap ótti. Onyń aıtýynsha, búgingi Almaty turǵyndarǵa barynsha jaıly qalaǵa aınaldy. Qalada jaqsy joldar tóseldi, turaqtar, velojoldar, jańarǵan trotýarlar kóz qýantady. Qor óz tarapynan Botanıkalyq baqtyń áýelgi keıpin qaıtaryp, qala turǵyndary úshin belsendi demalys ornyna aınalýy úshin bar múmkindikti jasamaq. Bul - qalanyń tynys alatyn ókpesi ispettes. Sondyqtan ony saqtap qalýǵa elimizdiń belgili sáýletshilerin tarttyq», - dedi E.Ospanov.
Joba 17,7 ga aımaqta júzege asady. Kapıtaldy qurylys qarastyrylmaǵan, ózgerister tek ınfraqurylym salasynda bolady. Parktiń qoǵamdyq aımaqtary qalpyna keltiriledi. Baqty aınaldyra qorshalǵan dýal aýystyrylady.
Beınebaqylaý kameralary ornatylyp, 3 parter ashylady.
(Soltústik -Tımırıazev kóshesinen, Ońtústik - Ál-Farabı kóshesinen, Batys - «Atakent» kesheni jaǵynan).
Sonymen qatar, 103 ga bolatyn jalpy aýmaqta sýarý, sýmen qamtý júıesi qalpyna keltiriledi. Joba 2018 jyldyń qazanynan bastap 2019 jyldyń jeltoqsanyna deıin júzege aspaq. Bul jumystarǵa 15 mln dollar jumsalady.
Tımırıazev kóshesinen kireberiste klassıkalyq nysandar bolady. Atap aıtqanda qurǵaq sýburqaq, kári jibek tal Botanıkalyq baqtyń sımvolyna aınalady. Kelýshilerge shyǵys stılinde jasalǵan sý qoımasy men sırek kezdesetin ósimdikter jınaqtar usynylady.
Ál-Farabı kóshesinen kireberis zamanaýı stılde jasalady. Qalalyqtar qalanyń taýlary men gúlge bólengen baqshasynda ýaqyt ótkize alady.
Ońtústik kireberiste ósimdikterdiń jańa túrleri shoǵyrlandyrylatyn bolady.
Baqtyń barlyq jerinde soqpaqtar jóndeledi.
Kelýshilerdiń qaýipsizdigin saqtaý maqsatynda baqta biryńǵaı qorshaý men beınebaqylaý júıesi ornatylady.
Atakent jaǵyndaǵy kireberiste kelýshilerdi jeńil modýldi panelder men temir torǵa shyrmalǵan ósimdikter qarsy alady.
Baqtyń ǵylymı jumystary baǵytynda ekologııalyq qaǵıdalardy saqtaı otyryp, sırek kezdesetin ósimdikter qoryn saqtap qalý kózdelgen. Sonymen qatar jańa ósimdikterdi jergilikti klımatqa jersindirý qolǵa alynbaq.
Aıta ketý kerek, 28 maýsymda qalalyq ákimdikte Botanıkalyq baqty túrlendirý kontseptsııasynyń tujyrymdamasy talqylanǵan bolatyn. Atalǵan másele qoǵamdyq talqylaýǵa da usynyldy. Tujyrymdama qalalyqtar tarapynan maquldanǵan keıin 26 qyrkúıekte qoǵamdyq keńeste jobanyń eskızi jan-jaqty tanystyryldy.
Buǵan deıin QR BǴM balansynda sanalyp kelgen botanıkalyq baqtyń ınfraqurylymdyq qamtýy Almaty ákimdiginiń menshigine ótti.
Al baqtyń ǵylymı jaǵy QR BǴM qaraýynda qaldy.
