Almatydaǵy boks keshi: Fırýza Sháripova Mılena Matovıchti jeńdi
ASTANA. QazAqparat - Almatyda ótken boks keshi aıasynda qazaqstandyq Fırýza Sháripova men serbııalyq Mılena Matovıch qolǵap túıistirdi.
Tartysty ótken kezdesý barysynda serbııalyq Qazaqstan boksshysynyń aýyr soqqylarynyń astynda qaldy. Osydan keıin Mılena Matovıchtiń bapkerleri sharshy alańǵa oramal laqtyryp, jekpe-jekti toqtatýǵa májbúr boldy.
Bul Fırýzanyń kásibı rıngtegi ekinshi jeńisi. Ol bir márte jeńilistiń aşy dámin tatqan edi.
Aıta keteıik, Almaty tórinde ótken boks keshinde qazaqstandyq Alı Ahmedov, Aıdar Sháribaevtar sharshy alańǵa shyǵyp, ekeýi de grýzııalyq qarsylastaryn alǵashqy raýndta nokaýtqa jibergen bolatyn. Sondaı-aq, 6 raýndtyq reıtıngtik jekpe-jekte ýkraındyq Valentın Kýtspen qolǵap túıistirgen Berikbaı Nurymbetov tóreshilerdiń sheshimimen jeńiske jetti. Birinshi aýyr salmaqtaǵy IBO nusqasy boıynsha ınterqurlyqtyq chempıon, Global Boxing Council nusqasynyń úsh dúrkin álem chempıony Isa Aqberbaev ta óziniń chempıondyq ataǵyn qorǵap qaldy. Ol Germanııa boksshysy Maık Kýrtsveıldi birinshi raýndta nokaýtqa túsirdi.
