Almatydaǵy blokposty buzyp ótpek bolǵan 70 adam qamaldy
Almaty qalalyq sotynyń baspasóz qyzmeti elimizde jarııalanǵan Tótenshe jaǵdaı rejımin buzǵan azamattarǵa qandaı shara qoldanylatynyn aıtty.
«26 naýryzdaǵy jaǵdaı boıynsha, Almaty ákimshilik ister boıynsha aýdanaralyq mamandandyrylǵan soty 120 ákimshilik is qaraǵan. Karantın aımaǵynyń shekarasyn buzbaq bolǵan 111 adam ákimshilik jaýapkershilikke tartyldy. Olardyń 70-i 5 táýlikten 10 táýlikke deıin qamaýǵa alynsa, 41 quqyqbuzýshyǵa 10 AEK mólsherinde aıyppul salyndy», - dedi baspasóz qyzmetinen.
Karantın merziminde kásipkerlikpen aınalysqan 9 tulǵanyń ekeýi 5 táýlikke qamalsa, qalǵan 7 adamǵa ákimshilik aıyppul salyndy.
Ákimshilik jazaǵa tartylǵandardyń ishinde «Voshod» saýda úıi, «Emıl» meıramhanasy, «Tsentr shashlyka» meıramhanasy, «Barbeque» dámhanasy, «Loto Club» oıyn zaly, «Mechta Market» JShS, «Genesys» oıyn klýby, «Ultimate» oıyn klýby bar.
Aıta ketý kerek, Almatyda 26 naýryzdan bastap barlyq irili usaqty saýda oryndarynyń jumysyna shekteý qoıyldy. Qalada tek dárihanalar men azyq-túlik dúkenderi jumys jasaıtyn bolady.