Almatydaǵy blokpostardan kún saıyn 10 myńnan astam kólik ótti
ALMATY. QazAqparat – Almaty polıtsııasynyń basshysy blokpostarda jumys istegen qyzmetkerlerdi marapattady, dep habarlaıdy QazAqparat tilshisi.
19 naýryzdan bastap Almaty qalasynyń perımetri boıynsha 27 blokposta jumys istegen qyzmetkerlerdi departament basshysy Qanat Taımerdenov arnaıy alǵys hattarmen marapattap, olardyń adal eńbekterin atap ótti.
«1 maýsymnan bastap, Almaty qalalyq jedel shtabtyń sheshimimen, koronavırýstyq ınfektsııanyń taralýyna qarsy karantındik sharalar aıasynda eki jarym aı boıy jumys istegen blokpostar óz jumysyn toqtatady. Aýrýdyń aldyn alýda mańyzdy ról blokpostarǵa berildi, olardyń qyzmetkerleri ınfektsııa juqtyrýdyń qaýip-qaterine qaramastan táýlik boıy qyzmet etip, zańdylyq pen tártipti qamtamasyz etti. Jalpy, blokpostardyń jumysyna 700-ge jýyq polıtsııa qyzmetkeri jumyldyryldy», – dedi Qanat Taımerdenov.
Blokpostardan kún saıyn ortasha eseppen 10 myńnan astam avtokólik ótti. Karantındik aımaqtyń shekaralaryn zańyz kesip ótpek bolǵan 1000-nan astam fakti anyqtaldy. Sonymen qatar, tótenshe jaǵdaı kezinde memlekettik qyzmetshini qorlaý, baǵynbaý jáne zorlyq-zombylyqtyń 34 faktisi tirkeldi. Jalpy alǵanda, qalada karantındi qamtamasyz etýge Ulttyq ulannyń bes myńnan astam áskerı qyzmetkerleri men polıtseıler jumyldyryldy. 19 naýryzdan bastap Almatydan tys jerde turatyn bir jarym myńnan astam tártip saqshysy kazarmaǵa aýystyryldy.
Blokpostarda, jaıaý patrýldeýde, karantındik aımaqtardy qorshaýǵa qatysqan 4 300-den astam polıtsııa qyzmetkeri bir aılyq jalaqynyń kóleminde aqshalaı syıaqymen marapattaldy. Taǵy 200-ge jýyq adamǵa dıplomdarmen jáne alǵys hattar tabys etildi.
«Іshki ister mınıstrligi basshylyǵynyń, qala ákiminiń jáne jeke ózimniń atymnan sizderge tótenshe jaǵdaı kezindegi janqııarlyq jumystaryńyz ben blok beketteriniń úzdiksiz jumys jasaǵany úshin alǵysymdy bildiremin. Dárigerlerge, ákimdik qyzmetkerlerine, sanıtarlyq qyzmet ókilderine, áskerı qyzmetkerlerge jáne senip tapsyrylǵan aýdandarda qyzmet kórsetken eriktilerge erekshe alǵys bildiremiz, – dep qorytyndylady Qanat Taımerdenov.
Buǵan deıin, qala ákimi 1 maýsymǵa qaraǵan túni blokpostardyń alynatyny týraly aıtqan bolatyn.
