Almatydaǵy blok beketke kólik soǵyldy
ALMATY. QazAqparat – Almatyda Toyota júrgizýshisi blok beketti soǵyp ótti. Saldarynan bir polıtseı zardap shekken, dep habarlaıdy QazAqparat tilshisi.
«Jol apaty búgin saǵat 15.00-de bolǵan. Almaty oblysy Qarasaı aýdany Kóksaı aýylynyń 1970 jylǵy turǵyny «Toyota Ipsum» kóligimen kele jatyp, Jańa ǵasyr kóshesiniń soltústik baǵytynda № 4 baqylaý-ótkizý beketindegi metall týrnıket soǵylǵan. Ári qaraı qozǵalysty jalǵastyra otyryp, júrgizýshi toqtap turǵan «Kıa» markaly polıtsııa kóligimen betpe-bet soqtyǵysyp, sodan keıin shette turǵan «Lada Prıora» men «Toıota Kamrı» kóligine soǵyldy. Saldarynan qyzmettik kólikte otyrǵan polıtseı Mereke Otarǵazy zardap shekti. Ol jedel túrde aýrýhanaǵa jetkizildi. Onyń eki aıaǵy syndy», – dedi Almaty qalalyq PD resmı ókili Saltanat Ázirbek.
Qazirgi málimet boıynsha, kólikte mas júrgizýshi otyrǵan.
«Boljam boıynsha mınıvendi mas júrgizýshi basqarǵan. Endi onyń alkogolge nemese esirtkige mas bolǵandyǵyn anyqtaý úshin medıtsınalyq tekseristen ótedi. Bekette adam kóp bolǵanymen, oqys oqıǵadan basqa eshkim zardap shekken joq «, – dedi Saltanat Ázirbek.
Bul derek QR Qylmystyq kodeksiniń 345-babynyń 1-bóligi boıynsha sotqa deıingi biryńǵaı tergeý tizilimine tirkeldi.
