Almatydaǵy «Barys-4» iri saýda bazary memleket menshigine qaıtaryldy

ALMATY. QazAqparat - Almatynyń ekonomıkalyq soty buǵan deıin jekeshelendirilgen «Barys-4» kóterme saýda bazaryn memleket menshigine qaıtarý týraly úkim shyǵardy, dep habarlaıdy QazAqparat tilshisi.

Іs materıaldary boıynsha, 2013 jylǵy jeltoqsanda «Naıza-BN» kompanııasy memleketten «Barys IV» bazaryn satyp alǵan. Mámile shartyn Almaty memlekettik múlik jáne jekeshelendirý departamenti jasaǵan. Buǵan deıin Bas prokýratýra bul nysan bes ese tómendetilgen baǵamen satylǵanyn habarlaǵan bolatyn. Naryqtaǵy quny 1,5 mıllıard teńge bolsa, ol 307 mıllıon teńgege satylǵan.

Osyǵan baılanysty Almaty prokýratýrasy osy shartty jaramsyz dep taný týraly talap-aryz túsirgen.

Almaty qalalyq sotynan málim etkendeı, quzyrly memlekettik organ zańdy tulǵanyń jarǵylyq kapıtalyndaǵy memleket úlesin jekeshelendirý kezinde zańsyz jeńildikter men artyqshylyqtar jasaǵan. Bul, prokýrordyń talap qoıýyna negiz bolǵan.

Sotqa deıingi tergeý barysynda talap-aryzda kórsetilgen derekter rastalǵan. Quzyrly organ ókili jekeshelendirý mámilesi memleket múddesine shyǵyn keltire otyryp jasalǵanymen kelisti.

Mámileni jaramsyz dep tanýǵa negiz bolǵan sebep – satyp alýshyǵa zańsyz jeńildikter men artyqshylyqtar berý, onyń sońy nysan qunynyń tómendetilýine alyp kelgen. «Sotta memlekettik múlikti arzandatylǵan baǵamen satý deregi rastaldy», - dep habarlady qalalyq sottyń baspasóz qyzmetinen.

Sotta satyp alý-satý sharty jaramsyz dep tanyldy.

«Almaty prokýratýrasynyń talap-aryzy qanaǵattandyrylyp, satyp alý-satý sharty jaramsyz dep tanylsyn. Sońǵy sheshim shyǵarylǵan kúnnen bastap bir aı ishinde sot sheshimine apellıatsııalyq jáne prokýrorlyq ótinishhat berýge bolady», - delingen usynylǵan málimette.

Sot sheshimi zańdy kúshine engen joq.