Almatydaǵy barlyq memlekettik oryndardyń málimetter bazasy jańartylady
ALMATY. 28 aqpan. QazAqparat /Erlik Erjanuly/ - Búgin Almaty qalasynda Qarjy mınıstrliginiń Salyq komıteti men Búkilálemdik bank Qazaqstandaǵy salyqtyq ákimshilikti reformalaý týraly jobanyń iske qosylýyna arnalǵan semınar ótkizdi.
Buǵan deıin mundaı rásim 21 aqpanda Astanada jasalǵan bolatyn. Salyq komıtetiniń tóraǵasy Dáýlet Erǵojınniń aıtýynsha, jobany tanystyrý sharasynyń Almatyda jalǵasyn tabýy kezdeısoq emes. Ol iri iskerlik jáne qarjylyq ortalyq sanalady.
"Biz qazir salyq qyzmeti jaǵynan birqatar kórshiles jáne alys shet elderdi artqa tastadyq. Árıne, áli de jetildire túsýdi qajet etetin tustarymyz bar. Sonyń biri - táýekeldi basqarý júıesi. Qazir salyqtyq ákimshilikti reformalaý jobasy aıasynda aqparattyq júıe jáne málimetterdi óńdeý ortalyǵy qurylýda", -deıdi Dáýlet Erǵojın.
Onyń sózine qaraǵanda, aǵymdaǵy jyly mamyr-maýsym aılarynda ózge memlekettik organdardyń málimetter qory tazartylmaq. Óıtkeni keıde salyq tóleýshilerge, keıde onyń ıeleginde joq múlikter týraly habarlamalar kelip túsip jatady. Bul aqparatty olar ózge memlekettik oryndardan alady. Sondyqtan endi olar barlyq málimetter bazasy júıelerin jańartpaq. Onysyz jalpy salyqtyq deklaratsııalaýdy júrgizý múmkin bolmaı otyr.
