Almatydaǵy barlyq balabaqsha shtattyq rejımde jumys istep tur

ALMATY. QazAqparat - Almatydaǵy mektepke deıingi barlyq 860 mekeme óz jumysyn qaıta bastady. Bul týraly Baqytjan Saǵyntaevtyń tóraǵalyǵymen ótken megapolıstiń tynys-tirshiligin qalpyna keltirý jónindegi qalalyq shtab otyrysynda ákimniń orynbasary Erjan Babaqumarov aıtty, dep habarlaıdy QazAqparat tilshisi.

Qazirgi ýaqytta 71 myńnan astam balany qamtıtyn 860 mektepke deıingi mekeme shtattyq rejımde jumys istep jatyr. Onyń 190 – memlekettik jáne 670 jeke menshik balabaqsha.

Ákim orynbasarynyń aıtýynsha, bilim basqarmasy kún saıyn balalardyń kelýine jáne balabaqshalarda sanıtarlyq talaptardyń qamtamasyz etilýine monıtorıng júrgizedi.

24 qańtardan bastap QR Bas memlekettik sanıtarlyq dárigeriniń 21 qańtardaǵy qaýlysyna sáıkes, kontıngenti 302 myńnan astam oqýshy bar 295 mekteptiń (207 memlekettik, 88 jeke) oqýshylary aralas formatta oqýǵa kiristi:

- 600 oqýshyǵa deıin kontıngenti bar 1-4 synyptarda, 115 mektepte (32 memlekettik, 83 jeke) - shtattyq rejımde oqıdy;

- kontıngenti 600 oqýshydan asatyn 180 mektepte (175 Memlekettik, 5 jeke menshik) - mektepterdiń jobalyq qýatynyń 50%-nan aspaıtyn júktememen shtattyq formatta bilim alady.

Budan basqa, jetim balalar men ata-anasynyń qamqorlyǵynsyz qalǵan balalarǵa arnalǵan 6 uıymnyń 354 tárbıelenýshisi shtattyq rejımde oqıtyn bolady.

Mektepterde sanıtarlyq talaptardyń saqtalýy erekshe baqylaýda, ata-analar arasynda túsindirý jumystary júrgizilip jatyr.

«24 qańtardan bastap 83 kolledjdiń 73 719 stýdenti (23 memlekettik, 60 jeke menshik) oqýdy bastady. Olar úshin oqytýdyń aralas formaty qarastyrylǵan: praktıkalyq sabaqtar ıkemdi keste boıynsha – oflaın, dáristik sabaqtar onlaın rejımde ótkiziledi», - dedi Erjan Babaqumarov.

Osyndaı formatta 24 myńnan astam oqýshyny qamtı otyryp, 23 qosymsha bilim berý uıymy óz jumysyn jalǵastyrýda.

Keri baılanysty qamtamasyz etý úshin Bilim basqarmasynda, aýdandyq bilim bólimderinde jáne ár bilim berý uıymynda Call-ortalyqtar jumys isteıdi.