Almatydaǵy balalar aýrýhanasynyń 6 qyzmetkerinen koronavırýs anyqtaldy
ALMATY. QazAqparat– Almaty qalalyq qoǵamdyq densaýlyq saqtaý basqarmasy koronavırýstyq ınfektsııany jańa juqtyrǵandar týraly aıtty, habarlaıdy QazAqparat tilshisi.
Qazirgi ýaqytta Almatyda Covid- 19 koronavırýstyq ınfektsııany juqtyrýdyń rastalǵan 513 jaǵdaıy tirkeldi.
«Almatyda kornavırýs juqtyrǵan 8 jaǵdaı anyqtaldy. 6-ýy Qalalyq balalar juqpaly aýrýlar aýrýhanasynyń qyzmetkerleri, bireýi Ortalyq qalalyq klınıkalyq aýrýhananyń qyzmetkeri jáne bireýi provızorlyq statsıonarda karantınde emdelip jatqan, buǵan deıin vırýs juqtyrǵan naýqaspen baılanysta bolǵan patsıent»,– dep habarlady basqarmadan.
Jalpy ınfektsııalyq statsıonarlarda koronavırýstyq ınfektsııadan 427 adam emdelýde.
Naýqastardyń jaı-kúıi: 3 patsıenttiń jaı-kúıi – óte aýyr, 6-ýynda – aýyr, 121 adamda – aýyrlyqtyń ortasha dárejesinde, qalǵandary qanaǵattanarlyq jaǵdaıda.
Koronavırýstyq ınfektsııadan 84 adam jazylyp, úıine shyǵaryldy.
Provızorlyq gospıtaldarda 278 adam, karantındik oqshaýlaýda – 431, úı karantıninde 9687 adam bar.
