Almatydaǵy bala ólimi: Ógeı ákeni adam óltirgeni úshin sottaıdy
ALMATY. QazAqparat – Balany urǵan adamnyń isi adam óltirý babyna aýystyryldy, dep habarlaıdy QazAqparat tilshisi.
Almaty polıtsııasynyń habarlaýynsha, qazir kúdikti qamaýda otyr.
«Qazirgi tańda oǵan qatysty qylmystyq is QR QK 106-babynan 99-babyna aýystyryldy. Bul jantúrshigerlik oqıǵa 23 qyrkúıekte bolǵan. Polıtsııaǵa 16:00-de aýrýhanadan habarlama tústi. Er adam oqıǵanyń izi sýymaı ustaldy»,- dedi Almaty polıtsııasynan.
Al ógeı ákesinen taıaq jegen bala esin jımastan aýrýhanada kóz jumdy.
«2 jastaǵy bala tym aýyr jaraqat alýyna baılanysty jansaqtaý bóliminde qaıtys boldy», - dedi qalalyq Qoǵamdyq densaýlyq basqarmasynyń baspasóz qyzmetinen.
Polıtsııa eń aldymen balanyń 34 jastaǵy ógeı ákesinen jaýap alǵan. Basynda ol bala qulap qaldy degen ýáj aıtty. Keıinnen tergeý materıaldarynyń nátıjesinde uldy ógeı ákesiniń urǵany anyqtaldy. Belgili bolǵandaı, balanyń anasy ol kezde jumysta júrgen. Jylaǵan balany jubata almaǵan ógeı ákesi uryp-soqqan.
Erli-zaıyptylar azamattyq nekede turǵan. Osydan 1,5 aı buryn Almaty oblysynan qalaǵa kóship kelip, «Kókqaınar» shaǵynaýdanynda turyp jatqan.
