Almatydaǵy Azıada-2011 sharasyna qyzmet etetin barlyq 6 sport kesheni qarashanyń 1-ne daıyn bolady - S.Seıdýmanov
ALMATY. Tamyzdyń 23-i. QazAqparat /Ádilet Musahaev/ - Almatydaǵy Azıada - 2011 sharasyna qyzmet etetin barlyq 6 sport kesheni qarashanyń 1-de qoldanysqa engiziletinine biz senimdimiz. Bul jaıynda búgin Almaty qalasy ákiminiń orynbasary Serik Seıdýmanov 7-shi qysqy Azııa oıyndary qarsańynda ótken halyqaralyq semınar-jıynda aıtty,
dep habarlaıdy QazAqparat.
Atalmysh semınar jumysyna qazaqstandyq sarapshylardan ózge Qyrǵyzstan, Ózbekstan memleketteriniń mamandary qatysýda. Al, reseılik mamandar elimizdiń Azıadaǵa daıyndyq qarsańyndaǵy sport keshenderiniń paıdalanýy boıynsha tájirıbe almasýda.
Tamyzdyń 25-ne deıin jalǵasatyn semınarda mamandar sport ǵımarattaryn halyqaralyq jarystarǵa daıyndaýdyń zamanaýı tehnologııalaryn jáne buqaralyq sportty damytýda sporttyq nysandardy paıdalanýdyń tıimdiligin arttyrý máselelerin talqylaıtyn bolady.
S.Seıdýmanovtyń aıtýynsha, sport keshenderin daıyndaý qarqyndy júrgizilýde. Balýan Sholaq atyndaǵy sport saraıyna qaıta jóndeý jumystary júrgizilip, "Medeý" muz aıdyny, "Shymbulaq" taý shańǵysy kesheni, "Tabaǵan" bazasy sııaqty keshender paıdalanýǵa berilýge daıyn.
"Aldaǵy jylǵy 15-shi qańtardan bastap bizge alǵashqy sportshy- qonaqtar kele bastaıdy. Al, Astanadaǵy Azıadanyń ashylý rásiminen keıin delegatsııanyń basym bóligi bizge aǵylady, sondyqtan qala jiti daıyndyq ústinde bolýy kerek", deıdi S.Seıdýmanov.
Búgingi kúni elimizde sporttyń damýyna erekshe kóńil bólinip otyrǵany belgili. Elimiz boıynsha kóptegen jańa sport saraılary, mektepteri ashylyp, sportty damytýda salaýatty ómir saltyn qalyptastyrýda úlken yqpal etýde. Sonymen qatar Elbasy 2010 jylǵy halyqqa Joldaýynda salamatty ómir saltyn qalyptastyrýǵa, buqaralyq sportty damytýǵa erekshe kóńil bólip, 2020 jylǵa deıin halqymyzdyń 30 paıyzy deneshynyqtyrýmen aınalysýyna jaǵdaı jasaý kerektigin aıtqan bolatyn.
