Almatydaǵy avtoturaqtar «Almaty parkıngine» beriletin boldy

ALMATY. QazAqparat – Almatyda qala atynan jalǵa alynǵan avtoturaqtar «Almaty parkıngine» beriledi. Bul týraly Áýezov aýdany turǵyndarymen kezdesýde shahar basshysy Erbolat Dosaev aıtty, dep habarlaıdy QazAqparat tilshisi.

Aýdan turǵyny «Jetisý-2» shaǵynaýdanyndaǵy 16 jáne 19-úılerdiń arasynda ornalasqan avtoturaqqa qatysty suraq qoıdy.

«Oǵan 10 jyldan astam ýaqyt boldy jáne ol jerde tártipsizdik bolyp jatyr. Biz menshik ıesiniń kim ekenin bilmeımiz. Kelisimsharttar da, fıskaldyq chekter de joq, bizge eshteńe usynbaıdy. Biraq, biz aı saıyn aqsha tólep otyrmyz. Ol jer jeke menshikte», - dedi qala turǵyny.
Almaty ákimi Erbolat Dosaev atalǵan másele boıynsha qandaı shara qabyldanatynyn aıtty.

«Biz endi qala atynan jalǵa alynǵan avtoturaqtardyń jerlerin «Almaty parkıngke» beretin bolamyz. Jınalǵan qarajat Almaty bıýdjetine túsip otyrady. Sizdiń máseleńizdiń anyq-qanyǵyn tekseremiz. Jer qatynastary basqarmasy arqyly jerdiń mártebesin anyqtap, qalalyq Mobıldilik basqarmasynan ne isteýge bolatynyn bilemiz. Ary qaraı bıznesti tekserýge moratorıı jarııalanǵanyna qaramastan, men Memlekettik kirister departamentinen prokýratýramen birlesip salyq tóleý jáne ózge de máselelerdi pysyqtaýdy suraımyn», - dedi Erbolat Dosaev.