Almatydaǵy avtobýs apaty: Dárigerler zardap shekkenderdiń jaǵdaıy týraly aıtty
ALMATY. QazAqparat - Almatydaǵy № 4 qalalyq klınıkalyq aýrýhananyń dárigerleri eki avtobýstyń soqtyǵysýy saldarynan zardap shekkenderdiń jaǵdaıyn aıtty, dep habarlaıdy QazAqparat tilshisi.
Jol-kólik apatynan keıin alty naýqas №4 qalalyq klınıkalyq aýrýhanaǵa jetkizildi.
«Bizdiń neırohırýrgııa bólimshesine tórt adam tústi - eki áıel jáne eki er adam. Jaǵdaılary turaqty, ortasha aýyr. Konservatıvti em qabyldap jatyr. Barlyǵynda bas mı jaraqattary bar. Keıbir naýqastarda retrogradtyq amnezııa bar. Bul este saqtaý qabiletiniń joǵalýy. Onyń ishinde júrgizýshi de bar», – deıdi №4 qalalyq klınıkalyq aýrýhananyń neırohırýrgııa bóliminiń meńgerýshisi Nurjan Ájibekov.
Atalǵan aýrýhananyń qosarlanǵan jaraqat bóliminde taǵy eki adam jatyr.
«Bizdiń bólimshede eki naýqas bar - er adam jáne áıel. Ekeýiniń de jaǵdaıy turaqty. Ómirlerine qaýip tónip turǵan joq. Biz barlyq qajetti kómekti tolyq kólemde kórsetemiz. Naýqastarǵa bas-mı jaraqaty, tirek-qımyl apparatynyń zaqymdanýy, keýde qýysynyń jaraqaty dıagnozy qoıyldy. Olar júredi, óz betinshe qozǵalady», - dep qosty №4 qalalyq klınıkalyq aýrýhananyń qosarlanǵan jaraqat bóliminiń meńgerýshisi Dáýren Túsipov.
Eske salaıyq, 8 qarasha kúni Almatyda Tóle bı - Abylaı han kósheleriniń qıylysynda eki avtobýs soqtyǵysty.
Alǵashynda polıtseıler 1 adamnyń kóz jumyp, 15 adamnyń zardap shekkeni týraly málimdegen bolatyn.
Keıin jaraqat alǵandar sany 17-ge artty.
Sońǵy málimet boıynsha, medıtsınalyq kómekke 21 adam júgingen, onyń 9-y aýrýhanaǵa jatqyzyldy.
Búgin «Almatyelektrokólik» JShS Almatyda soǵylǵan avtobýstardyń tejegishi isten shyqty degen aqparattyń shyndyqqa janaspaıtynyn aıtty.
Vıdeodan alynǵyn kadr
