Almatydaǵy avtobýs apaty: Baǵdarsham taımeri tekserilip jatyr
ALMATY. QazAqparat - Almatyda eki avtobýs soǵylyp, saldarynan bir adam qaza tapqan qıylystaǵy baǵdarsham taımeri tekserilip jatyr, dep habaraıdy QazAqparat tilshisi.
Almaty qalalyq mobıldilik basqarmasynyń málimetinshe, Abylaı han dańǵyly men Tóle bı kóshesi qıylysyndaǵy baǵdarsham jumysyn mamandandyrylǵan montajdaý-paıdalaný basqarmasynyń qyzmetkerleri teksergen. Apat bolǵan kúni baǵdarsham qurylǵylarynyń aqaýy tirkelmegen.
«Alaıda buqaralyq aqparat quraldarynda baǵdarshamnyń jumysy týraly aqparattyń paıda bolýyna baılanysty baǵdarshamdarǵa qyzmet kórsetetin mamandar oqıǵa ornynda tekserý júrgizdi. Nátıjıesinde aqaýlar rastalmady. Tekserý barysynda baǵdarsham qondyrǵysy, barlyq tehnıka qalypty jumys istep turdy»,- habarlady basqarmadan.
Vedomstvodaǵylar atap ótkendeı, baspasózde tablo jumysyndaǵy aqaýlar týraly aqparat qaıta paıda boldy.
«Keıin, barlyq tablolardy qıylystan bólshektep, synaq stendindegi jóndeý zerthanasynda synaý týraly sheshim qabyldandy. Úsh jumys kúniniń ishinde testileý eshqandaı aqaýlardy anyqtaǵan joq. Qazirgi ýaqytta testileý jumystary jalǵasyp jatyr, nátıjeleri keıinirek belgili bolady», - dep atap ótti Almaty qalalyq mobıldilik basqarmasynan.
Eske salaıyq, 8 qarasha kúni Almatyda Tóle bı - Abylaı han kósheleriniń qıylysynda eki avtobýs soqtyǵysty.
Foto: facebook.com/Gýlmıra Ileýova
