Almatydaǵy avtobýs apaty: 6 adam aýyr halde jatyr
ALMATY. QazAqparat – Dárigerler Almatydaǵy avtobýs pen KamAZ soqtyǵysýynan jaraqat alǵan jolaýshylardyń jaǵdaıy týraly aıtyp berdi, dep habarlaıdy QazAqparat.
Jolaýshylardyń barlyǵy №4 qalalyq aýrýhanaǵa túsken. 6 adam polıtravma bólimshesindegi qarqyndy terapııa bóliminde jatyr.
«Olardyń jaǵdaıy óte aýyr. Qazir shokqa qarsy terapııa júrgizilip jatyr. Barlyǵy joǵary ınertti qozǵalystyń kesirinen aýyr jaraqat alǵan. Patsıentterdi mýltıdıstsıplınarly brıgada ókilderi qarady. Bir patsıent ambýlatorııalyq em qabyldaý úshin úıine jiberildi», - dedi qalalyq qoǵam densaýlyǵyn saqtaý basqarmasynan.
Aıta ketý kerek, jol apaty Túrksib aýdanyna qarasty Shosseınaıa jáne Boraldaı kósheleriniń qıylysqan tusynda, tańǵy 9:35-te boldy. Avtobýs júrgizýshisi jol qozǵalysy erejesin óreskel buzyp, KamAZ júk kóligimen soqtyǵysty.
