Almatydaǵy Áýlıe-Voznesenskıı kafedraldyq shirkeýi kúrdeli jóndeýden ótedi
ALMATY. QazAqparat - Bıyl Almatyda Áýlıe-Voznesenskıı kafedraldyq shirkeýine kúrdeli jóndeý jumystary júrgiziledi. Bul týraly búgin Rojdestvo merekesi qarsańynda ótkizilgen arnaıy baspasóz máslıhatynda Astana jáne Qazaqstan mıtropolıti Aleksandr málim etti.
«Bıyl Almatydaǵy Áýlıe-Voznesenskıı kafedraldyq shirkeýiniń Orys pravoslavııalyq shirkeýi Almaty eparhııasy qaramaǵyna qaıtarylǵanyna 20 jyl tolady. Ol 1995 jyly qaıtaryldy. Sonda Elbasy Nursultan Nazarbaev: «Men elimizdiń barlyq pravoslavııa azamattaryna syılyq jasamaqpyn. Endi budan 70 jyl buryn Keńes úkimeti tartyp alǵan Almatydaǵy kafedarldyq sobor Qazaqstandaǵy pravoslavııalyq shirkeýge máńgilik qoldanysqa beriledi», degen bolatyn. Mine, osy tarıhı ýaqıǵaǵa bıyl 20 jyl tolady. Mereıtoı qarsańynda soborǵa kúrdeli jóndeý júrgiziledi. Ótken jyldyń sońynda arnaıy qor quryldy. Qazir bul másele qalalyq ákimdiktiń, Mádenıet jáne sport mınıstrliginiń qatysýymen sheshilip jatyr. Bıyl, kóktem shyǵyp, kún jylyǵan shaqta kúrdeli jóndeý jumystary bastalady. Oǵan ǵylymı mekemeler, mamandar tartylady. Jóndeý júrgizilgenimen soborda qulshylyq etý rásimderi jalǵasa beretin bolady», - dedi mıtropolıt Aleksandr.
Aıta ketelik, atalǵan shirkeý sáýletshi Andreı Zenkovtyń jobasy boıynsha 1904-1907 jyldary salynǵan. Onyń bir ereksheligi qurylysyna birde bir shege qoldanylmaǵan. Sondyqtan da, ol sáýlet óneriniń tamasha týyndysy sanalady.
