Almatydaǵy atysta qaza tapqan Aıan Ǵalıevtiń artynda eki balasy qaldy
ALMATY. QazAqparat - Almatyda shabýyldaýshylarmen bolǵan atysta qaza tapqan polıtsııa qyzmetkeri 42 jastaǵy Aıan Ǵalıevtiń artynda eki balasy qaldy. Bul týraly onyń týǵan jeńgesi málim etti.
Qazirgi sátte Almaty qalalyq jedel shuǵyl kómek kórsetý aýrýhanasy basshylyǵy sodyrlar qolynan zardap shekkender jaıynda ázirge eshqandaı túsinikteme bergen joq. Jýrnalıster birneshe saǵattan beri resmı aqparat kútip syrtta sabylyp otyr. Dárigerlerdiń aıtýynsha, áli operatsııalar júrgizilip jatyr. Aýrýhana aldynda adamdar kóp. Solardyń ishinen syrtqy jylap shyqqan bir áıeldi jýrnalıster kóńilin surap, áńgimege tartyp edi, atys barysynda aýyr jaraqat alyp, qaza tapqan QR ІІM «Kúzet» mamandandyrylǵan kúzet qyzmeti basqarmasynyń qyzmetkeri 42 jastaǵy Aıan Ǵalıevtiń týǵan jeńgesi bolyp shyqty. Jýrnalıster oǵan kóńil aıtty.
Jeńgesiniń aıtýynsha, Aıan Abylaı han dańǵyly men Tóle bı kóshesi mańynda ornalasqan Almaly aýdany boıynsha Memlekettik kirister departamentinde kúzette bolǵan eken.
«Ol posta turǵan. Bir ýaqytta adamdar «syrtta atys bolyp jatyr» dep júgirip kelipti. Sol arada Aıan syrtqa júgirip shyǵady. Tapanshasyn qolyna alam degenshe sodyr oǵan qaraı oq jaýdyrypty. Biraq, Aıan qulap jatyp, oǵan qarsy oq atqan. Óziniń bes nemese alty jerinen oq tıgen. Ol aýrýhanaǵa jetpeı jolda kóz jumdy. Endi onyń otbasyn kim asyraıdy?!», - dep jylady Aıannyń jeńgesi Marjan.
Onyń aıtýynsha, Aıannyń artynda áıeli, úshinshi synypta oqıtyn qyzy jáne jeti aılyq uly qaldy. Onyń ústine qolynda 85 jastaǵy anasy bar eken.
Aıan Ǵalıev 1974 jyly Almaty oblysynyń Sarqant aýdanynyń Baqaly aýylynda týǵan.
