Almatydaǵy áskerı-patrıottyq klýbqa Mánshúk Mámetovanyń esimi berildi

ALMATY. QazAqparat – Almatyda qazaqtyń dańqty qyzy, Keńes Odaǵynyń Batyry Mánshúk Mámetovanyń týǵanyna 100 jyl tolýyna arnalǵan eske alý sharasy ótti, dep habarlaıdy QazAqparat tilshisi QR Qorǵanys mınıstrliginiń saıtyna silteme jasap.

Shara barysynda mınıstrlik ókilderi, sala ardagerleri, «Jas sarbaz» respýblıkalyq qozǵalysynyń músheleri batyrdyń eskertkishine taǵzym etip, gúl shoqtaryn qoıdy. Sondaı-aq, jınalǵandar qaza tapqan batyrlardy bir mınýt únsizdikpen eske aldy.

Vedomstvo aqparatyna sáıkes, osy shara aıasynda Ulttyq áskerı-patrıottyq ortalyǵy Almaty fılıalynyń áskerı-patrıottyq klýbyna «Mánshúk» ataýy berildi.

«Bul – senderdiń ómirlerińdegi mańyzdy oqıǵa. Budan bylaı senderdiń áskerı-patrıottyq klýbtaryń Keńes Odaǵynyń Batyry, aty ańyzǵa aınalǵan pýlemetshi Mánshúk Mámetovanyń esimimen atalatyn bolady», - dedi Qorǵanys mınıstrligi Tárbıe jáne ıdeologııalyq jumystar departamentiniń bastyǵy Serik Borambaev.

Eske salsaq, búgin qazaqtyń qaharman qyzy Mánshúk Mámetovanyń týǵanyna - 100 jyl.

buǵan deıin Mánshúk Mámetovanyń esimi Oral qalasyndaǵy halyqaralyq áýejaıǵa berilgen bolatyn.