Almatydaǵy áskerı gospıtalde koronavırýs juqtyrǵan sońǵy naýqas jazylyp shyqty

ALMATY. QazAqparat - Koronavırýs ınfektsııasymen túsken sońǵy naýqas Almaty qalasyndaǵy áskerı gospıtalden emdelip shyqty. Qorǵanys mınıstrliginiń taratqan málimetine qaraǵanda, ol - 59 jastaǵy Galına Jýkova, dep habarlaıdy QazAqparat tilshisi.

«Qorǵanys mınıstrligi áskerı klınıkalyq gospıtaliniń búkil ujymyna júrgizgen em úshin rızamyn. Dárigerler men medıtsınalyq personal - joǵary bilikti mamandar, olardyń daıyndyǵy kórinip turdy. Áskerı dárigerlerdiń naýqastarǵa degen qamqorlyǵy, jaqsy kútimi men izgi qarym-qatynasy da baıqaldy. Dári-dármek tolyq kólemde jáne úzilissiz berildi. Tamaqtaný da túrli ári qunarly boldy», - deıdi emdelýshi.

Jalpy áskerı gospıtalde 800-ge jýyq adam, onyń ishinde áskerı qyzmetshiler emdelip shyqty. Shamamen 40% naýqas syrqattyń aýyr aǵymymen qabyldanǵan, sonymen qatar naýqastardyń jartysynan kóbi koronavırýs ınfektsııasynan bólek qan aınalymy júıesi, tynys alý organdary, endokrındik patologııa sekildi syrqattary bar egde jastaǵy adamdar boldy. Áskerı dárigerlerdiń aldynda mindetterdiń biri retinde indettiń asqynýyn aldyn alý jáne emdeý júrgizý edi.

«Bizdiń gospıtal epıdemııaǵa qarsy qatań rejımde jumys isteý boıynsha úlken tájirıbe jınady. Medıtsınalyq personal atalǵan patologııasy bar naýqastarmen jumys jasaýǵa daıyn, dárigerler men medbıkeler óz mindetterin jaqsy biledi, talap etiletin qaýipsizdik sharalaryn saqtap, sonymen qatar túrli kútpegen jaǵdaılarda áreket etýge ázir. Biz táýlik boıy jumys atqardyq. Barlyq dárigerler men medbıkeler asa joǵary kásibılikterin kórsetip, tanytqan qaısarlyqtarynyń arqasynda biz indetti jeńe bildik. Búgin biz sońǵy naýqasty emdep shyǵardyq, bul barlyq medıtsınalyq personal úshin úlken qýanysh», – dedi Almaty qalasy áskerı klınıkalyq gospıtaliniń bastyǵy Samat Sársenbaev.

Áskerı-medıtsınalyq mekeme bastyǵynyń aıtýynsha, gospıtaldiń materıaldyq-tehnıkalyq bazasy naýqastardyń ornalasýy men tamaqtaný máselelerimen qosa alǵanda emdik-dıagnostıkalyq protsesti tolyq kólemde júrgizýge múmkindik beredi.

Eske sala keteıik, 3 tamyzdan bastap Reseıden kelgen áskerı dárigerlermen birlesken jumys bastaldy. COVID-19 indetinen emdeý men tájirıbe almasý boıynsha birshama máseleler pysyqtaldy.

Aıta ketý kerek, kóptegen áskerı medıtsınalyq mekemeler koronavırýs indeti anyqtalǵan naýqastardy emdeýge jáne oqshaýlaýǵa qatysatyn emdik-profılaktıkalyq mekemeler tizimine engizilgen bolatyn.

Medıtsınalyq mekemeler karantındik, provızorlyq jáne ınfektsııalyq statsıonarlardyń talaptaryna sáıkes qaıta qurylǵan edi.