Almatydaǵy áskerı bólimde ózin atqan sarbazǵa eshqandaı qysym kórsetilmegen - Ulttyq ulan
Bul týraly Ulttyq ulannyń «Ońtústik» óńirlik qolbasshylyǵy qolbasshysynyń tárbıe jáne áleýmetik-quqyqtyq jumystar jónindegi orynbasary polkovnık Nııaztaı Álkeshev málimdedi, dep habarlaıdy QazAqparat tilshisi.
Polkovnık Nııaztaı Álkeshevtiń aıtýynsha, shart boıynsha áskerı qyzmetker qatardaǵy jaýynger Abylaı Sabyrov 22 tamyzda asa mańyzdy memlekettik nysandy kúzetken.
«Qatardaǵy jaýynger Sabyrov ol kúni rezervte turǵan. ıAǵnı, postta bolmaǵan. Saǵat túski 14:00 shamasynda 5-shi postta turǵan qarýlas dosyn aýystyrady. Ol jerde Abylaı qarýlasy túski asyn iship kelip, ony aýystyrǵanǵa deıin turýy kerek boldy. Ókinishke oraı, osy ýaqyt ishinde, ıaǵnı, bir saǵat ýaqyt aralyǵynda qaıǵyly jaǵdaı boldy.
Men tolyq jaýapkershilikpen aıtamyn, oǵan eshqandaı moraldyq ári fızıkalyq qysym kórsetilgen joq. Tipti, onymen birge qaraýylǵa týǵan jezdesi tústi», - dedi Ulttyq ulan polkovnıgi.
Jalpy, áskerı qyzmetker Almaty qalasynda týǵan apaıymen bir páterde turyp kelgen.
«Abylaı jasy 21-de, boıdaq. Otbasynda tórt balanyń tuńǵyshy. Ata-anasy Jetisý oblysy, Tekeli qalasynda turady.
Sarbaz Ulttyq ulannyń Batys óńirlik qolbasshylyǵynda merzimdi áskerı boryshyn ótegen. Ótken jyldyń 17 maýsymynda zapasqa shyǵyp, bizge shartty qyzmetker retinde 5 qazanda jumysqa kirdi.
Abylaı Sabyrov áskerı qyzmette ózin jaqsy jaǵynan kórsetti. Onyń qujattary jaqynda Joǵary bas qolbasshylyqqa jiberilip, ary qaraı joǵary laýazymǵa taǵaıyndalýy kerek bolatyn. Óz ózine qol jumsaýyna baılanysty onyń bári toqtatyldy», - polkovnık.
Sondaı-aq Nııaztaı Álkeshev qazirgi tergeý is-sharalarynyń qorytyndysy boıynsha sarbaz ólimi eger ózine qol jumsaýǵa deıin jetkizý nemese áskerı qyzmetti ótkerýmen baılanysty bolǵany anyqtalsa, onyń otbasyna zańnamaǵa sáıkes ótemaqy tólenetinin, al eger rasymen sýıtsıd jasaǵany anyqtalsa, onda ol basqa másele bolmaq ekenin jetkizdi.
Sóz sońynda polkovnık Nııaztaı Álkeshev marqum Abylaı Sabyrovtyń ata-anasy men týǵan týystaryna kóńil aıtty.
Aıta keteıik, Abylaı Sabyrovtyń denesin jerleýge ata-anasy búgin Tekeli qalasyna alyp ketti. Sondaı-aq, ata-anasy áskerı bólim men Ulttyq ulanǵa eshqandaı aryz shaǵym aıtqan joq.
Eske salaıyq, 22 tamyzda Almatydaǵy 3650 áskerı bóliminde qatardaǵy jaýynger Abylaı Sabyrov ózin-ózi atyp alǵan bolatyn. Alǵan jaraqatynyń nátıjesinde qaıtys boldy. Qazir quqyq qorǵaý organdary qajetti tergeý áreketterin júrgizip jatyr. Bolǵan oqıǵanyń sebepteri men mán-jaılaryn anyqtaý úshin qyzmettik tergeý taǵaıyndaldy.
