Almatydaǵy aryqtarǵa sý jiberiledi
ALMATY. QazAqparat - Almaty qalasy ishindegi barlyq aryqtarǵa 30 shildege deıin sý jiberiledi, dep habarlaıdy Qazaqparat tilshisi Baqytjan Saǵyntaevtyń Instagram paraqshasyna silteme jasap.
«Ákim bolyp taǵaıyndalǵan sátten bastap qala turǵyndary kótergen máselelerdiń biri aryq jelisiniń jaǵdaıy bolatyn. Qalalyqtarmen 8 shildede kezdesý kezinde men aryqtar men jaýyn kárizderine ınventarızatsııa júrgizýdi, olardyń barlyǵyn retke keltirýdi tapsyrǵan edim. Qazirgi kezde sý Áýezov, Almaly, Bostandyq jáne Medeý syndy tórt aýdandardyń aryqtary boıymen aǵýda. 30 shildege deıin jumystardy tolyq aıaqtap, barlyǵyna sý jiberetin bolamyz. Aıta keterligi, ne sebepti aryqtarda sý bolmaǵan, al shlıýzderdiń jabyq bolýy tipti túsiniksiz», - dep jazdy Baqytjan Saǵyntaev.
«Almaty aryqtaryndaǵy sý - qalanyń qaıtalanbas kórinisi», - deıdi ol.
«Aryqtarda sýdyń syńǵyrlap aǵýy — bizdiń qalamyzdyń qaıtalanbas kórinisi, onyń ereksheligi. Qashanda osylaı bolǵan. Sý jibergenimiz — jaqsy jańalyq. Qala qyzmetteri, árıne ózderiniń jumystaryn atqaryp, aryq júıesin retke keltiretin bolady. Aryqtardy taza ustaý, oǵan qoqystardy laqtyrmaý bárimizge ortaq is. Bul meniń qalalyqtarǵa jasaǵan ótinishim», -deıdi Almaty qalasynyń ákimi.
Buǵanǵa deıin, Almaty bıligi aryqtardyń nege qańsyp turǵanyn túsindirgen bolatyn.
