Almatydaǵy art-jármeńkege 300 dızaıner men sýretshi keldi
ALMATY. QazAqparat - Almatyda jańa jyl taqyrybyna arnalǵan «Christmas Art Fair-2017» art-jármeńkesi jumysyn bastady, dep habarlaıdy QazAqparat tilshisi.
Art-jármeńke QR Memlekettik ortalyq mýzeıinde ótip jatyr. Mýzeı qyzmetkerleri jármeńke jańa jyl keshinde dástúrli sharaǵa aınalyp, qala turǵyndaryna qýanysh syılap kele jatqanyn aıtty.
«Jármeńke kórmede Qazaqstan, Ispanııa, Reseı, Italııa, Ózbekstan, Germanııa jáne ózge de elderden kelgen 300 dızaıner men sýretshiniń avtorlyq jumystary men jeke jobalary qoıylǵan. Mysaly, Italııa men Ispanııadan kelgen kompanııalar jańa jyl taqyrybyna arnalǵan ıntererlerin usynyp otyr», dedi uıymdastyrýshylar.
Aıta keteıik, «Christmas Art Fair-2017» jármeńkesinde zergerlik buıymdar, kıimder men ınterer buıymdary, jańa jyl shyrshasyna taǵylatyn bezendirý quraldary, oıynshyqtar, farfor, sómkeler, keramıka, eko-kosmetıka ónimderi bar. Al táttisúıer almatylyqtar men qala qonaqtary úshin onda taıaqshadaǵy erekshe muz kámpıtter men avtorlyq karamel, shokoladtar men toqashtar qoıylǵan.
Sonymen qatar, qonaqtarǵa ınterer óneri boıynsha sheberlik synyptary ótkiziledi.
