Almatydaǵy Arbatta jabaıy saýdaǵa qarsy reıd ótkizildi
ALMATY. QazAqparat - Almaty polıtsııasy Arbatta ruqsat etilmegen jerlerde saýda júrgizip jatqan adamdardy anyqtaý boıynsha reıd ótkizdi, dep habarlaıdy Almaty qalalyq ІІD baspasóz qyzmetine silteme jasaǵan «QazAqparat» HAA tilshisi.
«Jóndeý jumystary júrgizilgen soń Arbat odan da ajarlana tústi, bul demalys orny jergilikti turǵyndardy ǵana emes, qala qonaqtaryn da ózine tartyp otyr. Sonymen birge, bul jer sharlar, oıynshyqtar jáne basqa da taýarlardy satatyndardyń súıikti ornyna aınalǵan.
Osyǵan baılanysty Jibek joly kóshesi men jaqyn ornalasqan turǵyn úılerdiń aýlalarynda polıtsııanyń ýchaskelik ınspektorlary, ıývenaldyq polıtsııa, tabıǵatty qorǵaý qyzmetkerlerinen qurylǵan jaıaý jasaqtar kún saıyn saǵat 20:00-den 01:00-ge deıin kezekshilik júrgizedi.
Satýshylarmen túsindirý jumystary júrgiziledi. Al kóshedegi mýzykanttarmen saǵat 23:00-den 06:00-ge deıin tynyshtyqty buzýǵa jáne demalýshylardyń mazasyn alýǵa bolmaıtyny týraly áńgime júrgizilýde», - dep habarlady Almaly aýdandyq ІІB bastyǵy Danııar Mendebaev.
ІІD málimetterine sáıkes, 2018 jyldyń 9 aıynda Almaly aýdandyq ІІB JPQ QR ÁQBtK 204, 434, 440, 437, 505-baptary boıynsha 627 tártip buzýshyny jaýapqa tartty. Sonymen birge, Almaty ІІD satýshylar (kásipkerlerdi) saýdany tek ruqsat etilgen jerlerde júrgizip, tıisti organdarda tirkelýdi suraıdy.
